УИХ-ын гишүүн Д.Бат-Эрдэнийн хилээр гарах эрхийг нь хязгаарлах захирамжийг шүүхээс баталжээ. Түүнийг яллагдагчаар татах тогтоолыг энэ сарын 1-нд баталсан тухай мэдээлж байсан бол 6-ны даваа гарагт уг тогтоолыг өөрт нь танилцуулж, гарын үсэг зуруулсан байна. Мөн өдөр Хан-Уул дүүргийн Эрүүгийн хэргийн анхан шатны шүүхэд Монгол Улсын хилээр гарахыг хязгаарлах таслан сэргийлэх арга хэмжээ авхуулах санал НПГ-аас хүргүүлжээ. Уг саналыг нь өчигдөр хэлэлцээд прокурорын саналыг үндэслэлтэй гэж шүүгч дүгнэн, дээрх захирамжийг гаргасан аж. УИХ-ын гишүүн Д.Бат-Эрдэнийг 2012-2016 онд УИХ-ын гишүүнээр ажиллаж байхдаа орон нутгийн өмчит “Тавантолгой” ХК-ийн ТУЗ-ийн дарга Б.Түвшинбаяр, гүйцэтгэх захирлаар ажиллаж байсан, өдгөө Өмнөговь аймгийн Засаг дарга Р.Сэддорж нарт нөлөөлж, 323 900 тонн нүүрсийг өр төлбөрт авсан мэтээр хуурамч бичиг баримт бүрдүүлсэн. “Тавантолгой”, “Тавантолгой транс” компанийн хувьцааг эзэмшиж байсан албан тушаалын байдлаа ашиглаж орон нутгийн өмчит дээрх компанид 18.4 тэрбум гаруй төгрөгийн хохирол учруулан, хөрөнгө завшихыг удирдан зохион байгуулсан хэрэгт буруутгаж, “Албан тушаалаа ашиглаж их хэмжээний хохирол учруулан эд хөрөнгө завшсан” үндэслэлээр яллагдагчаар татаад буй.
