Америкийн Дайны Судлалын Хүрээлэнгээс (ISW) 2-р сарын 6-ны өдөр гаргасан гол дүгнэлтүүд:
- Оросын зэвсэгт хүчин хоёрдугаар сарын дунд үеэс хойш Украины зүүн нутагт өргөн цар хүрээтэй шийдвэрлэх довтолгоонд бэлтгэж байна гэж Киев тооцоолж байна. Украины цэргийн зөвлөх "Financial Times" сонинд хэлэхдээ, Орос ойрын 10 хоногт (хоёрдугаар сарын 15 хүртэл) довтолгоо эхэлж, барууны танк, Украинд барууны орнуудын нийлүүлж буй явган цэргийн байлдааны машин ирэхээс урьтаж Украины цэргийн байрлалд цохилт өгөхөөр төлөвлөж байна. Луганск мужийн захиргааны дарга Сергей Гайдай Оросын арми 2-р сарын 15-наас хойш цохилт өгөх нөөцөө Луганск мужид шилжүүлсээр байгаа гэдгийг хэлэв. Украины Батлан хамгаалахын сайд Олексий Резников хэлэхдээ, хоёрдугаар сарын 24-ний орчимд Оросыг довтолгоо хийнэ гэж тооцоолж байна гэжээ. ОХУ Украиныг бүхэлд нь эзлэн түрэмгийлсний нэг жилийн ойд тэд энэхүү шинэ хүчтэй довтолгоогоор "бэлэг" барихаар төлөвлөж байгаа бололтой гэдгийг онцлов.
- Үүний зэрэгцээ Оросын зарим үндсэрхэг үзэлтнүүд Оросын энэ довтолгоо амжилттай болно гэдэгт эргэлзсээр байгаа бөгөөд ийм довтолгоо хийх боломж армид хязгаарлагдмал байгаа гэж тооцож байна. Тэд үүнийг хүн хүчний болон эдийн засгийн нэмэлт нөөц дайчлахгүйгээр амжилттай явуулах боломжгүй гэдгийг онцлон тэмдэглэсээр байна.
- Германы канцлер Олаф Шольц Украинд Германы танк нийлүүлэх нь Оросын аюулгүй байдалд заналхийлж байна гэсэн Путины "худал" мэдэгдлийг няцаасан гэж ISW мэдэгдэв. Хоёрдугаар сарын 2-нд В.Путин хэлэхдээ, Германы танкууд Орост дахин заналхийлж, дэлхийн хоёрдугаар дайны түүхийг давтах гэж байна гэж онцолсон юм. Энэ талаар Шольц хэлэхдээ, Путины хэлсэн үг нь "Украины эсрэг дайралтаа зөвтгөхийн тулд ашигладаг бүдүүлэг түүхэн харьцуулалтын нэг хэсэг" гэжээ.
- Кремлийн томилсон Оросын болон Украины эзлэгдсэн нутаг дэвсгэр дэх эзлэн түрэмгийлэгчдийн албан тушаалтнууд нийгмийн хяналтыг нэмэгдүүлэх, эдгээр нутаг дэвсгэрийг Орост нэгтгэхийн тулд хүүхэд, өсвөр үеийнхний нийгмийн шилжүүлгийн схемийг хэрэгжүүлсээр байна.
- Владимир Путин Оросын депутат, сенаторуудад олсон орлогоо олон нийтэд ил болгохгүй байх тухай зарлигт гарын үсэг зурснаар хууль тогтоох арга замаар Орост авлигыг цаашид институци болгох үүд хаалгыг нээж байна.
- Кремль Орос дахь "Вагнер ПМК"-ийн үүсгэн байгуулагч Евгений Пригожины хууль ёсны байдал, эрх мэдлийг үгүйсгэсээр байна. Бахмут орчмын "Вагнер ПМК"-ийн байлдааны ангиудыг Оросын ердийн цэргийн ангиудаар сольсны дараа Пригожин нөлөөгөө хадгалахыг оролдсоор байна. Гэсэн хэдй ч Бахмутын эргэн тойронд Оросын армийн "Вагнер ПМК"-ийн хүчнээс хараат байдал буурч байна. Энэ нь Кремлийн ойрын хүрээлэлд Пригожиний нөлөөг бууруулах магадлалтай гэж ISW өмнө нь онцолжээ.
Эх сурвалж: ВВС
