"Транспэрэнси Интернэшнл” олон улсын төрийн бус байгууллагаас зарладаг авлигын индексээр 2022 онд Монгол Улс 180 орноос 33 оноогоор 116-д жагслаа.
2021 онд манай улс 35 оноогоор 110-д жагссан бол өнгөрсөн жил зургаан байр ухарсан байна. Авлигын төсөөллийн индексийг тооцоолохдоо нийт 16 үзүүлэлтийг авч үздэг бол манай улсад найман үзүүлэлтийг авч үзсэн байна.
Энэ талаар Монгол дахь “Транспэрэнси Интернэшнл” байгууллагын тэргүүн Л.Төр-Од "Манай оноо гурван үзүүлэлт дээр унасан. Нэгд, Дэлхийн эдийн засгийн форумаас явуулдаг хувийн хэвшлийн компаниудын гүйцэтгэх удирдлагын судалгаанд 2021 онд 34 оноотой байсан бол 2022 онд 30 болж буурчээ. Хоёрт, эдийн засаг, улс төрийн эрсдэлийн үзүүлэлтээр 37 онооноос 32 болж буурав. Гуравт, ардчиллын үзүүлэлтээр 34 онооноос 28 болж буурсан нь хамгийн ноцтой юм. Өөрөөр хэлбэл, энэхүү үзүүлэлтэд огцом оноо алдсан нь анхаарууштай. Бид ардчиллын үнэлгээгээр хэзээ ч 31-ээс доош орж байгаагүй, анх удаа 28 оноотой боллоо. Засаг, төр, төрийн байгууллагад авлигын эрсдэл өндөр байгааг энэхүү үзүүлэлт харуулж байна. Ардчилсан тогтолцоо ажиллаж чадвал авлигаас ангид байх боломжтой. Улс төрийн намууд үүнд чухал үүрэгтэй" гэлээ.
Манай Улсын Засгийн газар 2021 онд авлигын индексийг хоёр оронтой тоонд оруулна гэж амласан удаатай. Үүний хүрээнд авлигын индексийг бууруулах Ажлын хэсгийг байгуулж, ахлагчаар нь ХЗДХ-ийн сайд Х.Нямбаатарыг томилсон. Ингэхдээ авлигын гэмт хэргийг бий болгож байгаа суурь хүчин зүйлс болох хууль эрх зүйн орчныг сайжруулна, ялангуяа авлигад хамгийн их өртөмтгий байгаа гүйцэтгэх засаглал улс төрийн манлайлал үзүүлнэ гэж амлаж байв. Амлалт өгч байх үед бид авлигын индексээр 111 дүгээрт жагсаж байлаа. Гэвч хоёр жил өнгөрөхөд манай улсын авлигын индексээр хоёр оронтой тоонд орох бус бүр ухарч 116 дугаар байранд жагслаа.
Монгол Улс сүүлийн таван жилд,
- 2018 онд 37 оноотой 93 дугаар байр
- 2019 онд 35 оноотой 105 дугаар байр
- 2020 онд 35 оноотой 111 дүгээр байр
- 2021 онд 35 оноотой 110 дугаар байр
- 2022 онд 33 оноотой 116 дугаар байрт жагссан байна.
