Монгол Улс хилийн чанадад 49 дипломат төлөөлөгчийн газартай бөгөөд тэнд 125 дипломатч ажиллаж байгаа аж. Дипломат төлөөлөгчийн газар гэдэгт Элчин сайдын яам, Ерөнхий консулын газар, Худалдааны төлөөлөгчийн газар багтдаг байна. Манайхтай ижил төстэй улс орнуудтай харилцуулахад дипломат төлөөлөгчийн газар болон дипломатуудын тоо багад тооцогддог аж. Иймд цаашдаа олон талт гадаад хамтын ажиллагааг өргөжүүлж, чухал ач холбогдолтой орнуудад ажиллах чадварлаг дипломатуудын тоог нэмэх зорилт тавин ажиллаж байгааг Гадаад харилцааны сайд Б.Батцэцэг онцолсон.
Мөн тэрээр Монгол Улс 2023 онд Узбезикстан улсад Элчин сайдын яам байгуулна гэдгийг онцолсон юм. Хэдий Узбекистан улстай иргэд хоорондын зорчигч хөдөлгөөн их биш ч эдийн засаг, худалдааны эргэлтээ тэлэхэд чухал ач холбогдолтой бүс гэж тодорхойлж байгаа аж.
Энэ талаар ГХ-ны сайд Б.Батцэцэг хэлэхдээ "Узбекистан улс нь бүс нутагтаа хүн ам, газар нутаг томд тооцогддог. Худалдаа, тээвэр ложистик ч сайн хөгжсөн. Монгол Улс Узбекистан улсад Элчин сайдын яам байгуулснаар Төв Азийн орнуудтай худалдаагаа нэмэгдүүлэх, тухайн бүсэд хамаарах улс орнуудад хөдөө аж ахуйн бүтээгдэхүүн нийлүүлэх сонирхол, авах сонирхол өндөр байдаг" гэсэн юм. Мөн энэ жил Монгол Улсын Гадаад харилцааны яам зургаан газарт Консулын газар байгуулахаар төлөвлөжээ.
