НҮБ-ын Хүүхдийн сангийн баг цас зудын байдалтай байгаа баруун аймгийн зарим сумдын нөхцөл байдалтай танилцаж, дэмжлэг үзүүлжээ.
Аймаг, орон нутгийн захиргаа, малчид хамтран өвөлжилтийн бэлтгэл хангасан хэдий ч энэ өвөл урьд жилүүдээс илүү хүйтэрсэн, зун ногооны гарц муу, гантай байсантай холбоотойгоор өвөлжилт хүндэрсэн хэмээн үзэж байгаа юм.
Зуданд өртсөн малчдад эрүүл мэнд болон нийгмийн суурь тусламж үйлчилгээг цаг алдалгүй хүргэхэд машин техник, бензин түлш, эм, өвс тэжээл зайлшгүй хэрэгтэй байгаа ажээ.
Тэр тусмаа малчдын хүүхдүүдэд дулаан гутал хувцас, эм витамин хэрэгцээтэй байгаа талаар НҮБ-ын Хүүхдийн сангаас мэдээллээ. Түүнчлэн зам цасанд хаагдаж, алслагдсан бүс нутгийн сурагчид сургуульдаа ирж чадахгүйн улмаас хичээл, цэцэрлэгээсээ завсардах эрсдэлтэй байгаа аж.
Тиймээс НҮБ-ын Хүүхдийн сангаас хамтрагч байгууллагууд болон иргэд олон нийтийг зудад өртсөн айл өрх, хүүхдүүдэд хамтдаа туслалцаа үзүүлэхийг уриалж байгаа юм.
