Өнөөдрийн байдлаар зудын улмаас хорогдсон малын тоо 10 мянга даваад байгааг аймгийн Хөдөө, аж ахуйн газраас мэдээлж байна. Иймд малчиддаа туслах уриалгыг тус газраас гаргаажээ.
Увс аймаг малын бэлчээрийн хувьд 2.5 сая толгой малын даацтай бол өнгөрсөн 2022 онд 3.5 сая толгой мал тоолуулжээ. Зуд болох магадлалтай учраас малчид 2 сая орчим толгой малаа нядалгаанд оруулж, онд орох боломжит мал сүргээ авч үлдсэн ч ийнхүү цаг үеийн байдлаас үлдсэн мал нь эндэж, малчид зутарч эхэлсэн.
Бэлчээр хүрэлцээгүй, өвс ургамал хомс, зуд нүүрлэх нь тодорхой болсон учраас тус аймгийн 763 өрхийн 13 мянга гаруй иргэн Архангай, Төв, Сэлэнгэ, Хэнтий аймгуудад отроор нүүдэллэн яваа аж.
Өнгөрсөн намар, аймгийн хэмжээнд 200 тонн өвч, 160 тонн тэжээд нөөцөлсөн ба тухайн нөөцөө сумдад тарааж эхэлсэн байна. Гэвч өвс, тэжээд өндөр үнэтэй учир малчид бэлэн мөнгөгүйн шалтгаанаар худалдан авах чадвар муу байгаа юм .
Малчид нядалгаанд оруулсан малын махаа нөөцөлчихсөн, түүнийгээ ОХУ руу рогарган худалдах, оронд нь малын өвс, тэжээл авах буюу бараа солилцох нь малчдын хувьд нэн чухал байгаа аж. Гэвч хил гаалийн татвараас үүдэн ОХУ-аас авах өвс, тэжээлийн өртөг өндөр байгаа нь хүндрэл болж байна. Иймд Засгийн газраас малчдаа бодлогоор дэмжин, ОХУ-тай өвс, тэжээл, мах солилцох, татварын хөнгөлөлт үзүүлэх дэмжлэг хүсэж байгаа юм байна. Уг хүсэлтийг аймгийн ХАА-н газраас холбогдох төрийн байгууллагад удаа дараа хүргүүлсэн ч хариу ирээгүй байна.
