Гурав орчим жил үргэлжилсэн Ковидын хуулиар нийт 1609 иргэн төрийн албанд томилогдсон билээ. Ковидын хуулийн хугацаа дууссан тул холбогдох албан тушаалтнуудыг чөлөөлж Төрийн албаны тухай хуулийн дагуу сонгон шалгаруулж авна гэдгээ Засгийн газар мэдэгдсэн. Үүнтэй холбогдуулан зургаан яамдын төрийн нарийн бичгийн дарга зургаа, 18 агентлагийн даргыг чөлөөлж, газрууд даргагүй байгаа юм.
Дээрх албан тушаалд дарга сонгон шалгаруулахдаа ЗГХЭГ-аас Төрийн албаны зөвлөлд захиалга хүргүүлж, сонгон шалгаруулалтыг Төрийн албаны зөвлөл /ТАЗ /хийх хуультай. Тэгвэл ЗГХЭГ-ын хүргүүлсэн захиалгын дагуу сонгон шалгаруулалт эхэлжээ. Одоогоор бүртгэл үргэлжилж байна.
Эхний ээлжид дараах албан тушаалд сонгон шалгаруулалт зарлав.
-Боловсролын ерөнхий газрын дарга
-Гэр бүл, хүүхэд, залуучуудын хөгжлийн газрын дарга
-Хөгжлийн бэрхшээлтэй хүний хөгжлийн ерөнхий газрын дарга
-Хөдөлмөр, халамжийн үйлчилгээний газрын дарга
-Мал эмнэлгийн ерөнхий газрын дарга
-Усны газрын дарга
-Төрийн худалдан авах ажиллагааны газрын дарга
ТАЗ-ийн хуваарийн дагуу дээрх албан тушаалын сонгон шалгаруулалтыг хоёрдугаар сарын 16-наас өмнө хийх аж.
