Хөгжлийн банкны УИХ-ын түр хорооны нотлох баримтыг шинжлэн судлах сонсголоор "Нью яармаг хаусинг прожект" ХХК-ийн зээлд холбогдох нотлох баримтыг хэлэлцлээ. "Нью Яармаг хаусинг прожект" ХХК нь 2024 он хүртэл Хөгжлийн банкнаас 195.8 мянган ам.долларын зээл авчээ.
"Нью яармаг хаусинг прожект" ХХК Хөгжлийн банкнаас зээл авахад тав дахь Ерөнхийлөгч Х.Баттулга нөлөөлсөн гэх мэдээлэл бий. Компанийн захирал Ц.Ууганбаяр нь Х.Баттулгыг Зам тээвэр, барилга хот байгуулалтын сайд хийж байхад нь зөвлөхөөр ажиллаж байсан. Ц.Ууганбаяр уг асуудалд тайлбар өгөв.
Ц.Ууганбаяр: “Сүүлийн 10 жил намайг Х.Баттулгатай холбож, итгэхийн аргагүйгээр хэлж байна. Би Х.Баттулга гэж хүнд хувь хүнийх нь хувьд, хувийн бизнесийнх нь хувьд зөвлөөгүй. Төрийн сайд хүн гэж зөвлөхөөр ажилласан. Орон тооны бус зөвлөхөөр ажиллахдаа төрөөс нэг ч төгрөгийн цалин аваагүй, залуу хүнийхээ хувьд оролцъё гэж итгэл үнэмшлээр ажилласан. Би Х.Баттулгатай ямар ч хамаагүй гэдэг нь тогтоогдож байх шиг байна. Дахиж холбож ярихгүй байхыг хүсье. Зөвхөн намайг хувь хүнээр минь, хийсэн ажил төслөөр минь үнэлбэл хүлээн зөвшөөрнө. Би хийсэн зүйлдээ хариуцлага хүлээнэ.
Намайг анх 2012 онд Хууль зүйн сайд байсан Ц.Нямдорж Х.Баттулгын зөвлөх зээл авчихлаа гээд ярьж байсан. Би яагаад гаднаас зээл авч болдоггүй юм. Би яагаад юм хийж, барилга барьж, төсөл хэрэгжүүлж, компани байгуулж болдоггүй юм бэ. Х.Баттулга гэж хүний хийж байгаа улс төр надад ямар ч хамаагүй. Тухайн үед төрийн сайд хүнд зөвлөж байна, төрийн ажил ингэж явдаг юм байна, туршлага сууя, ойлгоё гэсэн үүднээс ажилласан. Х.Баттулга гэж хүнээс болоод залуус битгий хохироосой. Тэр өөрөө ирээд тайлбараа хэлэх хэрэгтэй” гэв.
Түр хорооны шинжээчийн дүгнэлт: "Нью яармаг хаусинг прожект" ХХК зээлийнхээ 1.2 сая долларыг зориулалтын бусаар зарцуулжээ. Ингэхдээ 100 мянган долларыг иргэн Б.Моломжамц, 116.1 мянган долларыг иргэн Итгэл Цог, 900 мянган долларыг Анаграм ХХК-д тус тус зарлагадсан байна. Компанийн захирал Ц.Ууганбаярын дансаар 45 мянган доллар шилжүүлэн авч, хувийн хэрэглээ болон зээлийн картын төлбөрт шилжүүлсэн байна.
