Ховд аймгийн Дөргөн сумын Аргалант багийн нутаг дэвсгэр, бор шанаан дотор талд Хар морьтын тэвх хэмээх газар хоёр ирвэс уулнаас бууж иржээ. Үүнээс улбаатайгаар малчид, иргэдэд сэрэмжлүүлэг хүргэж буй аж. Бид энэ талаар Ховд аймгийн Дөргөн сумын Засаг Дарга Ш.Цэдэн-Иштэй холбогдож тодрууллаа.
Тэрбээр “Манай сум говь хээрийн бүс хосолсон нутагтай. Манай сумаас 100 км-ийн цаана Ховд аймгийн Чандмань сумын Жаргалант Алтайд 100 орчим ирвэс тоолсон байдаг.
Хоёр ирвэс Хар-Ус нуурын зэгсэнд орж ирсэн талаар Аргалант багийн малчин н.Түвдэн-Осор бидэнд утсаар мэдээлэл өгсөн юм.
Тиймээс малчид, иргэдэд сэрэмжлүүлэх үүднээс багийн дарга нар мэдээлэл түгээн ажилласан. Ховд аймгийн Байгаль орчны газар, тусгай хамгаалалттай газрын захиргаанд мэдэгдсэн.
Үүнтэй адилаар 2012 онд ирвэс орж ирж, нэг айлын малыг барьсан тохиолдол гарсан. Махан идэштэй амьтан учир нуурын зэгснээс идэх зүйл олдохгүй тул айлын мал руу дайрах эрсдэл өндөр. Тиймээс бид сэрэмжлүүлэг мэдээ түгээсэн. Нутгийн ойр тойрны айлууд мэдээлэл авсан учраас малаа адгуулан маллаж, хүүхдээ аль болох малд явуулахгүй байхад анхаарч байгаа” гэлээ.
