Ардчилсан Намын/АН/ даргад нэр дэвшигчид өчигдөр орой үнэмлэхээ авсан. Тодруулбал, УИХ-ын гишүүн асан З.Нарантуяа, Сангийн сайд асан С.Баярцогт, БСШУ-ны сайд асан Л.Гантөмөр, УИХ-ын гишүүн С.Одонтуяа нар тус намын даргад өрсөлдөхөөр болж байна. Нэр дэвшигчдийн үнэмлэхийг УИХ-ын гишүүн, АН-ын гишүүн О.Цогтгэрэл, Ж.Батсуурь, Ш.Адьшаа нар гардуулж өгсөн юм.
Ингэснээр АН-ын даргын сонгууль албан ёсоор эхэлж байгааг УИХ-ын гишүүн Ж.Батсуурь мэдэгдэв.
Харин өнөөдөр 10.00 цагт ҮБХ-ны ээлжит бус хурлыг Төрийн ордонд зохион байгуулж, намын даргад нэр дэвшигчдийг бүртгэн авч олонхийн санал авсан нэр дэвшигчийг 13.00 цагт зохион байгуулагдах намын Их хурлаараа батламжлах аж.
АН өнөөдөр Үндэсний Бодлогын Хорооны ээлжит бус хурал болон Их хурлаа хийх юм байна. ҮБХ-ны хуралд 300 гаруй, Их хуралд 1,200 гишүүн оролцох аж. ҮБХ-ны хурлаас хамгийн олон санал авсан нэр дэвшигчийг Их хурлаараа батламжилж, намын даргын нэрийг Дээд шүүхэд хүргүүлж бүртгүүлэх дараалалтай байна.
