Хөгжлийн Банкнаас "Мон лаа" ХХК-д олгосон зээлийн үлдэгдэл одоогийн байдлаар 7.5 тэрбум төгрөг бөгөөд чанаргүй зээлийн ангилалд оржээ.
"Гэвч уг зээлийн зарцуулалтыг цаашид шалгах боломжгүй нөхцөл байдал үүссэн. Тодруулбал, Хөгжлийн Банкнаас олгосон 5.56 тэрбум төгрөгийг БНХАУ-ын Хөдөө аж ахуйн банкны Өвөрмонгол дахь салбараар дамжуулан “Shu Guang Jia Gong” компанид таван удаагийн гадаад гүйлгээгээр шилжүүлсэн байна. Зээлийн зарцуулалтыг бүрэн нягтлах боломжгүй болсон тул асуудлыг нотлох ёстой гүйцэтгэх захирал Г.Энхсайхан гэдэг хүнийг гэрчээр дуудсан боловч хүрэлцэн ирээгүй” гэдгийг Түр хорооны дарга Б.Энхбаяр хэлэв.
Иймд зээл олгох асуудалтай холбоотойгоор гэрчээр дуудсан Уул уурхайн сайд асан Д.Ганхуягаас тухайн үед "Чингис" бондыг зарцуулах Бодлогын зөвлөлөөр тус компанийн төслийг танилцуулж байсан талаар Түр хорооны дарга Б.Энхбаяр асуулт тавилаа.
Уул уурхайн сайд асан Д.Ганхуяг “Тухайн үед "Чингис" бондыг зарцуулах зөвлөл гэж байгуулагдсан. Хоёр удаа хуралд сууж байсан шиг санаж байна. Уул уурхайн яаманд төмрийн чиглэлийн мэргэжлийн холбоо байсан юм. Нэгт импортыг орлох, хоёрт экспортын, гуравт нь улс орны хөгжилд нөлөө бүхий дэд бүтэц гэх гурван зорилттой байсан.
Тухайн үед Уул уурхайн яамны тухайн үеийн мэргэжлийн холбоодтой уулзахад өр зээлтэй 3-4 компани байсан. Эдгээрийн дотор "Мон лаа" ХХК орсон байж. Санаж байгаагаар зарим компани нь өртэй байсан. Тэгээд экспорт хийж, өр зээлээ төлөөсэй гээд дөрвөн компанийг бондын зөвлөлд нь Засгийн газарт танилцуулж байсан асуудал бий.
Өнөөдөр Монгол Улсад хамгийн хэцүү асуудал нь утаа байх шиг байна. Тиймд нэг талаас цемент, нөгөө талаас нүүрсээ түүхийгээр нь гаргадаг. Үүнийг төмөр, ган хийц болговол өнөөдрийн гаргаж байгаа дөрвөн тэрбум ам.доллар 20 тэрбум ам.доллар болох боломжтой. Тийм учраас би дэмжиж явсан.
Би бас зарчмаа мэднэ. Хөгжлийн Банктай уулзаж, утасдаагүй. Яамны мэргэжлийн холбоодод орж ирсэн төслийг Засгийн газрын хуралдаанаар танилцуулах нь сайдын үүрэг. Үүргээ хэрэгжүүлсэн өөр юу ч байхгүй" гэв.
