Герман улс "Patriot" агаарын довтолгооноос хамгаалах системийг Польш руу шилжүүлж эхэлжээ.
Герман улс НАТО-гийн холбоотон орнуудын чухал дэд бүтцийг хамгаалахын тулд агаарын довтолгооноос хамгаалах "Patriot" системийг Польш руу шилжүүлж эхэлсэн тухай мэдээлэв.
Тус системийг үйлдвэрдэгч "Raytheon Technologies" компанийн мэдээлснээр Германы армийн гурван эскадриль Польшид эдгээр системийг дахин байршуулах ажлыг гүйцэтгэх ёстой. Өнөөдөр Баруун Померан-Рюген дүүргийн Бад Сильзе хотын цэргийн албан хаагчдыг Польш руу илгээжээ. Ойрын өдрүүдэд тэнд цэргийн техник шилжүүлэх ажил эхэлнэ.
Өмнө нь IAR агентлаг Германаас хэдэн зуун цэргийн албан хаагч Польшид ирж, пуужингийн довтолгооноос хамгаалах "Patriot" системд ажиллах болно гэж бичиж байв. Системүүд нь Польшийн Украинтай хиллэдэг Люблин мужид байрлах юм. Нийтдээ 12 орчим хөөргөгч төхөөрөмж тээвэрлэхээр төлөвлөж байна.
Үүнтэй зэрэгцэн Украины цэргийн албан хаагчид АНУ-д "Patriot" агаарын довтолгооноос хамгаалах системтэй ажиллах бэлтгэл сургуулилт хийж эхэлжээ. Түүнчлэн АНУ-ын Батлан хамгаалах яам "Raytheon Technologies" компанитай зенитийн пуужингийн системийг ашиглахад "техникийн туслалцаа" үзүүлэх гэрээ байгуулж, Украинд нийлүүлэх гэж байгаа тухай мэдээлсэн байна.
Эх сурвалж: Gazeta.ru
