АНУ-ын Ерөнхий прокурор Меррик Гарланд пүрэв гарагт АНУ-ын Ерөнхийлөгч Жозеф Байдены гэрээс олдсон нууц бичиг баримттай холбоотой хэргийг шалгах тусгай прокуророор Роберт Хурыг томиллоо.
Холбооны прокуророор ажиллаж байсан Р.Хур энэ хэрэгт хэн нэгэн хүн, хуулийн этгээд хууль зөрчсөн эсэхийг шалгах эрхтэй.
Тусгай прокурорыг томилсон нь тус хорооны мөрдөн байцаалт явуулах ажиллагаанд нөлөөлөхгүй гэж Төлөөлөгчдийн танхимын Хяналт, хариуцлагын хорооны тэргүүн Жеймс Комер тухайн өдөр мэдэгдэв.
М.Гарланд хэлэхдээ, пүрэв гарагийн өглөө Ж.Байдены хувийн өмгөөлөгч өмнө нь энэ хэргийг хянан хэлэлцэж байсан холбооны прокурор руу утасдаж, Делавэр муж улсын Вилмингтон дахь Ж.Байдены хувийн байшингаас нууцын зэрэглэлтэй баримт бичиг олдсон гэж мэдэгджээ.
Энэ бол Байдены хувийн байшингаас нууцын зэрэглэлтэй биччиг баримт олдож буй хоёёр дахь тохиолдол юм. Өмнө нь өнгөрсөн оны арваннэг, арванхоёрдугаар сард өмгөөлөгчид Жон Байдены Дэд Ерөнхийлөгчөөр ажиллаж байх үеийн нууц бичиг баримтуудыг Вашингтонд төвтэй Пенн Байден төвийн судалгааны төвөөс, мөн Вилмингтон дахь хувийн байшингийнх нь гаражаас олж илрүүлж байсан юм.
Эдгээр бичиг баримт дунд Америкийн тагнуулын мэдээ, Украин, Иран, Их Британитай холбоотой нууц мэдээллийн материалууд байсан гэж мэдээлж байна.
Ерөнхийлөгчийн хуулийн зөвлөх Ричард Саубер энэ долоо хоногийн эхээр хэлэхдээ, Байдены хуулийн баг уг баримт бичгүүдийг олж илрүүлсний дараа Обамагийн үеийн засаг захиргааны баримт бичгүүдийг АНУ-ын Үндэсний Архив, Баримт бичгийн газарт (NARA) зохих ёсоор хадгалахыг баталгаажуулахын тулд холбооны эрх баригчидтай хамтран ажиллаж байна гэжээ.
АНУ-ын Хууль зүйн яам мөн АНУ-ын Ерөнхийлөгч асан Дональд Трампыг Цагаан ордноос гарч явахдаа нууцын зэрэглэлтэй бичиг баримттай зүй бус харьцсан гэх хэргийг шалгаж байна. Өнгөрсөн зун Холбооны мөрдөх товчоо (ХМТ) Д.Трампын Флорида дахь Мар-а-Лаго дахь эдлэнд нэгжлэг хийж, "маш нууц"-ын зэрэглэлтэй бичиг баримтыг олж авсан юм.
АНУ-ын Ерөнхийлөгчийн бичиг баримтын тухай хуульд ерөнхийлөгч, дэд ерөнхийлөгч нар бүрэн эрхийнхээ хугацаанд бүх бичиг баримтаа хадгалж, ажлаасаа гарахдаа Үндэсний Архив, Баримт бичгийн газарт /NARA/-д өгөх ёстой гэж заасан байдаг.
Эх сурвалж: ВВС
