“Эрдэнэс Тавантолгой” ХК нүүрсээ биржийн цахим системээр борлуулах ажлыг ирэх сараас эхлүүлэх гэж байна. Энэ тухай тус компанид ажиллаж байгаа бүрэн эрхт төлөөлөгч Ж.Ганбаатар ийнхүү ярив.
Тэрбээр “Хөрөнгийн биржийн системийг ашиглан цахим худалдаагаа хийнэ. Хөрөнгийн биржийн платформоор бид коксжсон нүүрсний үнэ 170 ам.доллар байна гэх мэтээр бүх төрлийн нүүрсний үнийн мэдээллээ худалдан авагч БНХАУ-ын талд хүргэж байна. Ингэснээр Хятадын компаниуд мөн тэр платформ руу орж бүртгүүлээд худалдан авах саналаа өгнө. Бид 170 ам.доллароос дээшээ үнээ дуудаж, хамгийн өндөр үнийн санал өгсөн худалдан авагчид нүүрсээ нийлүүлнэ.
Мөн бид үнийн мэдээллээ багцалж санал хүргүүлнэ. Гол нь энд Хятадын талд манайхыг хэдий хугацаанд нүүрсээ нийлүүлэх боломжтой юм гэсэн хүлээлт үүсэх байх. Энэ нөхцөлд манайхаас жишээ нь, 7 хоногт 500 мянган тонныг хүргэнэ, Ганц мод юм уу Гашуунсухайт боомтоор нийлүүлнэ гэдгээ зарлаж мэдэгдэх үүрэг хүлээнэ. Ер нь цахим худалдааг эхлүүлснээр манай Хөрөнгийн бирж олон улсад арилжих үйл ажиллагаа эхлүүлж байна гэж хэлж болно” гэжээ.
Нүүрсээ биржийн системээр цахимаар борлуулах засгийн газрын журам гарсан байгаа бөгөөд “Эрдэнэс Тавантолгой” ХК, УУХҮЯ, Монголын хөрөнгийн биржийн хамтарсан ажлын хэсэг байгуулагдан ажиллаж байгаа аж.
Ташрамд сонирхуулахад БНХАУ-ын 170 гаруй компани “Эрдэнэс Тавантолгой” ХК-иас нүүрс худалдан авдаг байна.
