Баянгол дүүргийн ИТХ-ын дарга Б.Сэмжидмаа 2022 он 12 дугаар сард гурван өдрийн зайтайгаар нийт 370 сая төгрөг зарлагдаж, ИТХ-ын төлөөлөгч нартаа нэг удаагийн буцалтгүй тусламж олгожээ. Үүнийг нөгөө талаас нь тайлж уншвал юм л бол өөрийнх нь суудал руу ноцож, сав л хийвэл авч хаячих гээд байдаг 40 төлөөлөгчөө тус бүрт нь 10 орчим сая төгрөгийг “буцалтгүй тусламж” нэрээр олгож “авлигадаж”.
Ерөнхий сайдын хэлж байгаагаар Монгол Улс тэр тусмаа төрийн албаныханд Хэмнэлтийн хууль үйлчилж эхлээд ердөө долоон сар болж байна. Уг нь, ИТХ гэдэг бага парламент буюу иргэдийн төлөөлөл болон дүүргээ хөгжүүлэхээр санал бодлоо уралдуулж, гүйцэтгэх засаглалдаа хяналт тавихаар сонгогдсон хүмүүс. 10 орчим сая төгрөгийн буцалтгүй тусламж аваад байх хүн тэдэн дунд үгүй гэдгийг хэнбугай ч мэднэ. Дийлэнх нь том биш ч жижиг компанийн захирал ямар нэгэн албан тушаалтнууд байдгийг бид дөрвөн жилд нэг удаа болдог сонгуулиар тараасан сурталчилгааны хуудаснаас нь хардаг. Гэтэл төрийн сан хаагдахтай зэрэгцэн ИТХ-ын дарга Б.Сэмжидмаагийн захирамжаар төрийн мөнгөнөөс 10 сая төгрөгийн “тусламж” болгон гардан авсан байгаа юм.
Тодруулбал, 2022 оны 12 дугаар сарын 15-ны өдөр ИТХ-ын дарга Б.Сэмжидмаа “Төлөөлөгчийн нийгмийн баталгааг хангахад нэг удаагийн буцалтгүй тусламж олгох тухай” 96 тоот захирамж гаргажээ.
Шилэн дансны мэдээллээс харвал 2022 оны 12 дугаар сарын 16-ны өдөр нэг удаагийн буцалтгүй тусламж гэсэн утгатай 160 сая төгрөгийн гүйлгээ хийгдсэн байна.
Ингээд зогссонгүй. 2022 оны 12 дугаар сарын 19-ний өдөр ахиад “Төлөөлөгчийн нийгмийн баталгааг хангахад нэг удаагийн буцалтгүй тусламж олгох тухай” 98 тоот захирамж гарган тухайн өдөртөө буцалтгүй тусламж гэх 210 сая төгрөгийн гүйлгээ хийжээ.
Нийт 370 сая төгрөг. 12 дугаар сарын 21-ний өдөр мөн 1 удаагийн тусламж гэх 27 сая төгрөгийг зарлагаджээ. Гэхдээ тушаал нь тодорхойгүй байгаа юм. Баянгол дүүргийн ИТХ нь 41 төлөөлөгчтэй. Б.Сэмжидмаа дарга эрхбиш өөрийгөө үлдээсэн гэж найдъя.
Монгол Улсын Засаг захиргаа, нутаг дэвсгэрийн нэгж, түүний удирдлагын тухай хуульд “ИТХ нь төсөвтэй байх ба захиран зарцуулах эрх даргад байна” хэмээн хуульчилсан ч буцалтгүй тусламж олгох тухай нэг ч үг өгүүлбэр байхгүй.
ИТХ-ын даргын бүрэн эрхэд зөвхөн “Хурлын хороо, төлөөлөгчдийг бүрэн эрхээ хэрэгжүүлэх нөхцөл бололцоогоор хангах ажлыг зохион байгуулалтын удирдлагаар хангах” гэж бийг Баянгол дүүргийн ИТХ-ын дарга Б.Сэмжидмаа танд сануулья.
