
Хүйтэн дайны үеийн хамгийн алдартай тагнуулчдын нэг Ана Монтес 20 гаруй жил АНУ-ын шоронд хоригдсоны эцэст суллагдлаа.
Өдгөө 65 настай Монтес Пентагоны тагнуулын агентлагт шинжээчээр ажиллаж байх үеэсээ Кубын тагнуулынхантай хамтран ажиллаж тэднийг Пентагоны маш нууц мэдээллээр хангаж байжээ.
2001 онд түүнийг баривчлагдсаны дараа АНУ-ын албаныхан Куба арал дээрх АНУ-ын тагнуулын ажиллагааг бараг бүрэн илчилсэн гэж мэдэгдсэн юм.
Зарим эх сурвалж Монтес бол Америкийн тагнуулын байгууллагад баривчлагдсан хамгийн аюултай агентуудын нэг байсан бөгөөд тэрээр АНУ-д маш их хохирол учруулсан гэжээ.
Ерөнхийлөгч Жорж Бушийн үед Сөрөх тагнуулын газрын дарга асан Мишель Ван Клив 2012 онд Конгресст хэлэхдээ, Монтес Куба дахь Америкийн агентуудын бүх үйл ажиллагаанд саад учруулсан гэж байв.
"Тэдний талаар бидний мэддэг бүх зүйлийг кубачууд маш сайн мэддэг байсан бөгөөд үүнийг өөрсдөдөө ашигтайгаар ашиглаж чаддаг байсан. Үүнээс гадна тэрээр хамтран ажиллагсадтайгаа ярилцахдаа Кубын нөхцөл байдлын үнэлгээнд нөлөөлж чаддаг байсан гэжээ.
Монтезийг баривчлагдсаны дараа түүнийг Америкийн асар их хэмжээний нууц материалыг задруулсан хэрэгт буруутгаж 25 жилийн хорих ял оноослон юм. Шүүгч шийтгэл оногдуулахдаа түүний үйлдэл нь Америкийн бүх үндэстний аюулгүй байдалд заналхийлж байна гэж онцолж байв.
Хүйтэн дайны бусад олон алдартай тагнуулчдаас ялгаатай нь Ана Монтес хувийн ашиг сонирхлоор бус үзэл суртлын үүднээс ажиллаж байв. Рональд Рейганы засаг захирганы Латин Америкийн талаарх бодлого үйл ажиллагаа нь түүнд таалагдаагүй бөгөөд энэ нь түүнийг Кубын тагнуулын албатай хамтран ажиллахад түлхэц болсон юм.
Түүнчлэн тэрбээр Никарагуад дайны гэмт хэрэг болон бусад харгис хэрцгий хэрэг үйлдсэн гэж сэжиглэгдсэн баруун жигүүрийн босогчдын Контрас бүлгийг Америк дэмжиж байгаад эгдүүцэж байсан гэжээ.
Мөрдөн байцаалтын тайланд дурдснаар 1984 онд Жонс Хопкинсийн их сургуулийн нэг оюутан Ана Монтест хандаж дараа нь түүнийг Кубын тагнуулын ажилтантай танилцуулж, Никарагуад туслахын тулд Кубын талд ажиллахыг эргэлзэлгүйгээр зөвшөөрчээ.
Бараг 20 жилийн турш тэрээр Вашингтоны нэгэн ресторанд Кубын кураторуудтай хэдэн долоо хоног тутамд уулзаж, маш нууц мэдээллээр хангадаг байв.
2001 оны 9-р сард түүнийг баривчилсан юм. Суллагдсаныхаа дараа Монтес таван жилийн турш хяналтад байх болно.
Эх сурвалж: ВВС