АНУ-ын Конгрессын Төлөөлөгчдийн танхим дахь Бүгд найрамдах намын тэргүүн Кевин Маккарти 15 дахь шатны санал хураалтын дүнгээр баасан гарагийн орой спикерээр сонгогдлоо. Тэрээр 216 санал авсан бол түүний гол өрсөлдөгч Ардчилсан намын Хаким Жеффрис 212 санал авчээ.
Танхимын хуралдааныг Америкийн төв телевизүүд дамжуулав. Өмнөх шатны санал хураалтад Маккарти ижил тооны санал авсан ч ялалт байгуулахад хангалтгүй байв. Сүүлийн шатанд зургаан конгрессменууд нэг ч нэр дэвшигчийн төлөө санал өгөөгүй бөгөөд энэ нь Маккартигийн ялалтыг баталгаажуулсан юм.
Модератор Шерил Жонсон “Калифорнийн Кевин Маккарти олонхийн санал авч, Төлөөлөгчдийн танхимын даргаар зохих ёсоор сонгогдсон” гэж мэдэгджээ. Бүгд найрамдах намынхан 57 настай Маккартиг сонгогдсоныг алга ташилтаар угтжээ.
Эх сурвалж: ВВС
