Татваргүй барааны дэлгүүрээс авсан архиндаа хуурамч акц нааж зардаг бүлэг этгээдийг илрүүлсэн тухай өнөөдөр сонины сэтгүүлч Г.Гавжаа хэдхэн минутын өмнө цахим хуудсаараа дамжуулан олон нийтэд мэдээллээ.
Хойд хил дээрх эдийн засгийн чөлөөт бүс дэх татваргүй барааны дэлгүүрээс их хэмжээний архи авч,
хуурамч акц наан, нийслэлд авчран борлуулж их хэмжээний ашиг олдог бизнесийн томоохон сүлжээ бүлэглэлийг цагдаагийнхан илрүүлэн шалгаж байгаа тухай мэдээлэлдээ дурьдсан байна.
Тэрбээр “Иргэн А нь бусадтай бүлэглэн Сэлэнгэ аймгийн Алтанбулаг чөлөөт бүсээс импортын виски, архи согтууруулах ундаа их хэмжээгээр худалдан авч, онцгой албан татварын хуурамч тэмдэгт нааж, татвар төлөхөөс зайлсхийж, ашиг олж мөнгө угааж байсан аж.
Шалгалтаар импортын 9800 орчим архи, виски, мөн тийм хэмжээний хуурамч онцгой албан татварын тэмдэгт хураан авч, шалгалтаа үргэлжлүүлж буй талаар эх сурвалжууд мэдээллээ” гэжээ.
