УИХ-ын чуулганы хуралдааны үеэр Б.Пүрэвдорж гишүүн нүүрсний хулгайтай холбоотой асуудлаар эрх баригчдад гурван зүйлийг анхааруулав.
Тэрбээр “40 их наядын хулгайн ядаж дөрвөн их наяд төгрөгийн олж ирээрэй. Дөчин тэрбумын олж ирсэн гээд яриад сууж байх вий. Хуулийнхан болон эрх баригчид хариуцлагатай ажиллаарай. Нэгдүгээрт үндсэн оффтейк гэрээнүүдийг ил болго. Энэ гэрээнүүд бүгдээрээ 60 ам.долларын уурхайн амны үнээр хийгдсэн. Ядаж 100 ам.доллар дээр авч ирэх ажлыг ойрын хугацаанд хийх хэрэгтэй. Дээрээс нь мухар төмөр замын холболтыг хийж дуустал, дээгүүр нь тээвэр хийтэл оффтейк гэрээнүүдийг цуцал. Төмөр замаа холбоод өөрсдийнхөө нүүрсийг зөөгөөд гаргана биз. Бодь Интернэшнл гэрээгээ өөрчлөхгүй гээд том том юм ярьж байна гэсэн. Болохгүй бол УИХ-ын тогтоолын төслийг өргөн барина. Хоёрдугаарт нүүрс худалдах, худалдан авах гэрээний хулгайнууд байгаа. “Эрдэнэс Тавантолгойн” Б.Ганхуяг дээр албан тушаалтнууд очоод 200-500 мянган тонн нүүрсний гэрээ зураад өгчих гээд дундаас нь доллар авдаг асуудал бий. Б.Ганхуяг хоригдоод УИХ-ын 19 гишүүн, Засгийн газрын 2 сайдын нэрийг мөрдөн байцаалтдаа хэлсэн сураг байгаа. Хууль хяналтынхан энэ асуудал хариуцлагатай хандах ёстой шүү” гэв.
