-АНУ-ын гарт амиа алдсан генерал К.Солейманиг Иран даяар дурсан санав-
Иранд өнгөрсөн мягмар гарагт улс орон даяар хүмүүс цугларч, гурван жилийн өмнө буюу 2020 оны 1-р сард АНУ-ын зэвсэгт хүчнийхний гарт амь үрэгдсэн Исламын хувьсгалт гвардийн корпусын Кудс хүчний командлагч асан генерал Касем Солейманигийн дурсгалыг хүндэтгэжээ.
Түүнийг нас барсны гурван жилийн ойг тохиолдуулан Тегеранд болсон ёслолд оролцсон иранчууд төрийн далбаагаа намируулж, Америкийн эсрэг уриа лоозон барьжээ.
Ираны Ерөнхийлөгч Эбрахим Раиси цугласан олонд хандан “Цэргийн дээд удирдагчийнхаа төлөөх цуст өс хонзонгийн тухайд бид мартаагүй, мартахгүй” гэж хэлээд К.Солейманийг дарангуйлалтай тэмцэхийн бэлгэдэл хэмээн нэрлэжээ.
Э.Раиси “Бид алуурчид болон гэмт хэргийн ард байгаа хүмүүсийг тайван унтуулахгүй” гэж тангараглав.
Мөн Исфахан, Йазд хот болон К.Солейманигийн төрсөн нутаг Керман хотод гашуудлын ёслол болсон байна.
Болсон явдлыг эргэн сануулахад 2020 оны 1-р сарын 3-нд Багдад хотын олон улсын нисэх онгоцны буудалд Америкийн агаарын довтолгооны улмаас Ираны генерал К.Солеймани, Иракийн Аль-Хашд аль-Шааби бүлэглэлийн командлагчийн орлогч Абу Махди аль-Мухандис нар амь үрэгджээ. Иран энэ аллагыг "төрийн терроризм" гэж нэрлэсэн юм.
Эх сурвалж: Синьхуа
