Өчигдөр УИХ дахь Ардчилсан намын бүлгээс санаачилсан Эвлэрлийн ажлын хэсэг Ардчилсан намын ҮБХ-ны гишүүдэд зориулсан "Эв нэгдэл" зөвлөгөөнийг зохион байгуулав. Энэ үеэр УИХ-ын гишүүн С.Одонтуяа эрх баригчдыг хатуухан шүүмжлэсэн юм.
Тэрбээр “Өнөөдөр Монгол хүний үнэ цэнэ буурч байна. Хоёр хүний 1 нь ядуу боллоо гэдгийг статистикийн хороо мэдээллээ. Үүнийг засахын төлөө, улс орноо хөгжүүлэхийн төлөө бид сайн ажиллах ёстой. Бидний дайсан бол ядуурал. Монгол өнөөдөр дэлхийд шившиг болж байна. Бүх хөрөнгө оруулагч нараа гаргачихсан. Төр засаг нь хулгай хийчихсэн. Тэгэхээр Ардчилсан нам 30 жилийн өмнө хувьсгал хийж байсан одоо дахиад 30 жилийн дараах хувьсгалыг бид нар л хийх юм байна. Эрх мэдэл нэг хүнд төвлөрөх ямар аюултай байдгийг дэлхийн улс орнууд харлаа. Нэг намд эрх мэдэл төвлөрөхөөр улс орон яаж сүйрдэг гэдгийг ард түмний жагсаал цуглаан харууллаа. Энийг засахын төлөө бид үгээ хэлж байна” гэсэн юм.
