УИХ-ын гишүүн Б.Жавхлан нарын өргөн барьсан Хөрөнгө оруулалтын банкны тухай хуулийн төсөл болон хамт өргөн мэдүүлсэн хуулийн төслийн анхны хэлэлцүүлгийг УИХ-ын чуулганаар хийж байгаатай холбогдуулан УИХ-ын гишүүн Б.Энхбаяр үг хэлж, хуульчлах ёстой асуудлыг дүрмээр зохицуулах асуудлыг хязгаарлахыг санал болгов.
Тэрбээр “Хөрөнгө оруулалтын төрөлжсөн банкнаас үнэт цаас санхүүгийн төрөлжсөн хэрэгсэл худалдах, худалдан авах харилцааг Монголбанк, Санхүүгийн зохицуулах хорооноос баталсан журмаар зохицуулна гэсэн заалт төсөлд байна. Энэ харилцаа бол журмаар жиш хуулиар зохицуулагдах ёстой. Үнэт цаасны хуулиар зохицуулагддаг уг нь. Тэгэхээр энэ хуулиар нь зохицуулах ёстой.
Хууль тогтоох эрх мэдэл зөвхөн УИХ-д хадгалагдаж байгаа. Гэтэл энэ эрх мэдэл хоёр янзын Засгийн газар болон бусад газарт шилжээд байдаг. Засгийн газар болон сайд нар ийм журмаар зохицуулна гэх нэрээр хэрэг дээрээ булааж аваад байна. Дараа нь, хариуцлагыг нь харин хэн үүрдэг вэ гэвэл УИХ. Тэгэхээр боломжтой харилцааг бол хуульчлах ёстой. Журмын цаана эрхийг нь олж аваад хулгайгаа хийдэг.
Жишээ нь, энэ хуулийн төсөл дээр баталгаа, батлан даалттай холбоотой асуудал бий. Хөрөнгө оруулалтын төрөлжсөн банкнаас тавих баталгаа, батлан даалтын шаардлага нөхцөлийг Монголбанк журмаар зохицуулна гэж ганц өгүүлбэр оруулж. Үнэндээ энэ бол хуульчлах шаардлагатай нөхцөл. УИХ чинь төрийн мөнгөний бодлого, зээлийн бодлогыг УИХ тогтооно гэсэн Үндсэн хуулийн заалт бий. Гэтэл энэ бүрэн эрхийг Монголбанк журам гаргаад авах гээд байгаа юм. Хөгжлийн банкны түр хороон дээр ажиллахдаа үүнийг нарийвчлах шаардлагатайг би анзаарсан.Учир нь арилжааны банкны удирдлагууд хувь хүнээрээ эсвэл өөрийн үүсгэн байгуулсан хамаарал бүхий компаниар баталгаа гаргадаг. Өөрийн банкнаас гаргаж байгаа зээл дээр өөрөө, өөрийн хамаарал бүхий компаниар баталгаа гаргаж мөнгө угаасан олон тохиолдол илэрч байгаа. Энэ асуудал тодорхой болж баримтаар яригдах байх. Үүнийг судлаад үзэхээр Монголбанк оролцдог, өөгшүүлдэг, хуйвалддаг нөхцөл байдал тогтоогдож байгаа. Тийм учраас Монголбанкинд журам гаргах хэлбэрээр эрх олгоход би итгэлгүй байна. Эцсийн хэлэлцүүлэг дээр журмаар зохицуулсан энэ асуудлыг гүйцээн боловсруулж, хуульчлах хүсэлт гаргаж байна” гэлээ.
