С.Эрдэнэ тэргүүтэй АН-ынхан өнөөдөр мэдээлэл хийлээ. Тэд нүүрсний хулгайн гэмт хэрэгтэй холбоотой асуудал болон УИХ дахь АН-ын гишүүд, эрх баригчдын шийдвэр зэрэг цаг үеийн асуудлаар байр сууриа илэрхийлсэн юм.
С.Эрдэнэ: Аливаа нэг сенсаацтай, дуулиантай төрийн хэмжээний гэмт хэрэг үйлдлүүдийг ямар нэгэн байдлаар олон нийтийн анхаарлыг төөрөлдүүлсэн зохиомол сенсаацыг бий болгож, гэмт хэргийн олон нийтийн анхаарлыг сулруулдаг. Энэ аргаар эрх баригчид олон түмний анхаарлыг сарниулж, эрх баригчдын гаргаж байгаа алдаа, завхралыг хамгаалах хаацайлах энэ арга туршлагаа гаргууд эзэмшсэн байдал нь харагдаж байна. Үүний нэг тод жишээ нь нүүрсний гэгдэх гэмт хэргийн асуудал.
Олон тоо яригдаж байна. Яг өнөөдөр Монгол улс төртэй юм бол, Монгол улс хууль засаглалтай юм бол, Монголын газрын хэвлийн баялаг болсон нүүрсийг яг хэдэн тонн нүүрс, ямар үнээр, хэдий цаг хугацаанд, хаана тээвэрлэгдэж очсон юм, гаргасан этгээдүүд нь хэн байсан гээд бүх асуудал тодорхой байх ёстой. Монгол улс хилтэй гаальтай. Гаалиар гарч байгаа ачаа бараа бүгд бүртгэлтэй байх ёстой. Бүртгэлгүй гаргасан эрх мэдэлтнүүд хэн байв. Өнөөдрийг хүртэл зарлахгүй байна. Тодорхой тооны хэдэн хүний нэр хэлчихээд, гол эзэд нь ард нь нуугдаад ямарч гэм буруугийн хариуцлага хүлээхгүй, олон түмнийг мартагнуулах ажлыг хийж байна.
Мөн "Эрдэнэс тавантолгой" ХК-ийн нийт орд, нүүрсийг нийт ард иргэддээ 100 хувь хувьчлах асуудлыг яаралтай шийдэх ёстой.
