Боловсрол, шинжлэх ухааны яам (БШУЯ) болон Мэргэжлийн хяналтын байгууллага хамтран найман сарын хугацаанд улсын хэмжээнд СӨБ, ЕБС-ийн 59,055 багш, удирдах ажилтны боловсролын баримт бичигт хяналт, шинжилгээ үнэлгээ хийжээ. Улмаар 724 зөрчлийг илрүүлж, хууль хяналтын байгууллагад шилжүүлсэн талаар мэдээлэв.
Мөн дахин нягтлах шаардлагатай 2,000 орчим баримт бичиг байгаа аж. Зөрчилтэй гэж үзсэн 724 дипломыг ангилж үзвэл,
- Дипломын дугаар давхардсан
- Бүртгэлд огт байхгүй дугаар бичсэн
- Өмнөх болон дараагийн шатны боловсролын баримт бичгийн зөрчил
- Боловсролын байгууллага буюу сургуулийн буруутай үйлдэл
- Боловсролын удирдах дээд байгууллагын алдаа зэрэг тус тус байна.
Шалгалтын дүн мэдээллээс харвал бага ангийн багш, цэцэрлэгийн багшийн эрэлт хэрэгцээ их байдгийг ашиглах буюу энэ мэргэжлээр дипломын зөрчил үүсгэх нь түгээмэл байсныг мэдээллээ.
