Боомтын сэргэлтийн үндэсний зөвлөл БНХАУ-ын Өвөрмонголын өөртөө засах орны дэд тэргүүлэгч, боомт хариуцсан даргатай цахимаар уулзжээ. Уулзалтаар хоёр орны боомтын чиглэлд баримтлах бодлого, хамтын ажиллагааг өргөжүүлэх чиглэлд санал солилцсон байна.
Тухайлбал, Гашуунсухайт-Ганцмод чиглэлийн төмөр замын бүтээн байгуулалтыг үргэлжлүүлэх хүрээнд 2023 оны нэгдүгээр сард багтаан Чайна Энержи компанийн төлөөллийг Улаанбаатарт урихаар болсон аж. Мөн БНХАУ-ын ӨМӨЗО-ы талаас AGV болон 5G технологийг ашиглан бараа солилцоог нэмэгдүүлэх санал тавьсан байна. Өлзий-Цагаандэл-Уул боомтын үйл ажиллагааг эрчимжүүлэх тал дээр санал солилцов. Манай талаас энэ тал дээр чармайлт гаргаж ажиллахаар болсон гэв.
Аюултай ачаа, тэсэрч дэлбэрдэг бодисыг зөвхөн Эрээнээс дамжуулдаг. Тэгвэл цаашид БНХАУ-ын ӨМӨЗО-ы талаас зорчигч ихээр нэвтэрдэг боомтуудаар аюултай ачаа нэвтрүүлэх нь зохимжтой бус гэж үзсэн байна. Энэ хүрээнд Ханги-Мандалын боомтоор энэ чиглэлийн бараа, ачаа тээвэрлэх боломжийг судалж, хийх боломжтойг илэрхийлсэн гэж Боомтын асуудал хариуцсан сайд Х.Нямбаатар мэдээллээ.
Мөн БНХАУ-ын онцгой комиссын 144 дүгээр шийдвэрээр нэгдүгээр сарын 8-аас зорчигч тээврийн боомтыг шат дараатай нээхээр болжээ.
Энэ талаар Боомтын асуудал хариуцсан сайд Х.Нямбаатар “Хоёр талын бэлтгэл ажил хангагдсан байдлаас шалтгаалан нэгдүгээр сарын 8-аас зорчигчийн боомтууд, автозамын боомтууд нээгдэнэ. Тэгэхээр яг 8-аас нээнэ гэж хэлэхэд хэцүү. Цахим уулзалтын үеэр лавлаж сайн асуулаа. Хоёр талаас бүх бэлтгэл ажил хангагдсан тохиолдолд эхлээд Эрээн-Замын-Үүд боомтыг нээнэ. Үүний дараа Шивээхүрэн-Сэхээ, Ханги-Мандал гэсэн дарааллаар боомтуудыг нээхэд бэлтгэн ажиллаж байна гэж ӨМӨЗО-ы талаас мэдэгдлээ. Бэлтгэл ажил хангагдсан тохиолдолд нээнэ. Бэлтгэл ажил хангагдахгүй бол хугацаа өөрчлөгдөх магадлалтай. Манай талаас бол бэлтгэл ажил бүрэн хангасан” гэлээ.
