УИХ-ын дарга Г.Занданшатар хилийн зурвас газрыг тогтоож, улсын тусгай хэрэгцээнд авах талаар мэдээлэл хийлээ.
Тэрээр, "Нийгмийн сүлжээгээр Хоёр талын гэрээгээр болон НҮБ-д бүртгүүлсэн Монгол улсын халдашгүй дархан хил алдагдсан мэтээр буруу ташаа мэдээлэл тарааж байна. "Монгол улсын нутаг дэвсгэрийн бүрэн бүтэн байдал, улсын хил халдашгүй дархан байна" гэж Монгол улсын үндсэн хуульд заасан байдаг.
Газрын тухай хуулийн 16 дугаар зүйл болон 17 дугаар зүйлд "Хилийн зурвас газрыг улсын тусгай хэрэгцээнд авна" гэж заасан байдаг.
Өөрөөр хэлбэл Монгол улсын хилийн халдашгүй дархан байдал, хил орчмын бүс нутгийн хил хамгаалалтын чадавхыг сайжруулах зорилгоор хилийн бүс орчим нутгийг улсын мэдэлд тусгай хэрэгцээнд авсан тогтоол баталсныг мушгин гуйвуулж тайлбарлаж байна. Энэ тогтоолын зорилго нь Монгол улсын засгийн газраас өргөн мэдүүлсэн Монгол улсын хилийн зурвас газрыг тогтоож улсын тусгай хэрэгцээнд авах юм.
Улсын тусгай хэсэгт зөвшөөрөлгүй газар эзэмших, өмчлүүлэхийг таслан зогсоож, хилийн халдашгүй дархан байдлыг хангах зорилгоор зөвхөн УИХ-аас шийдвэрлэдэг эрх зүйн үндсийг бүрдүүлсэн.
УИХ бүрэн эрхийнхээ хүрээнд хилийн зурвас газрыг улсын тусгай хэрэгцээнд авсан. Үүнээс өөр улсын хилийн халдашгүй дархан байдлыг алдагдуулах ямар нэгэн эрх зүйн акт гаргаагүй болохыг албан ёсоор мэдэгдэж байна" гэв.
