Засгийн газрын хэрэг эрхлэх газрын дарга Д.Амарбаясгалан "Эрдэнэс Монгол" ХХК-тай холбоотой асуудлаар мэдээлэл хийж байна.
Тэрбээр "Эрдэнэс Монгол ХХК-ийн гүйцэтгэх захирлыг хоёр долоо хоногийн өмнө томилсон. Үүнтэй холбогдуулж тус компани цаашдаа цэвэр менежментийн компани болно. Энэ үүрэг чиглэлийн дагуу бүтцээ баталсан бөгөөд ажилчдын нээлттэй сонгон шалгаруулалтын талаар өнөөдөр мэдээлэл өгнө.
Түүнчлэн Ерөнхий сайдын өгсөн үүрэг чиглэлийн дагуу УИХ, Засгийн газрын гишүүн, дэд сайд нарын хамаарал бүхий этгээдүүд нь тэднийг төрийн албанд ажиллаж байх хугацаанд төрийн өмчийн болон төрийн захиргааны байгууллагад удирдах албан тушаал хашдаггүй байх. Мөн УИХ, Засгийн газрын гишүүд, дэд сайд нарын өөрийн эзэмшлийн болон хамаарал бүхий этгээдүүдийн компани нь төрийн тендер худалдан авалтын үйл ажиллагаанд ордоггүй байх зохицуулалтыг хийнэ" хэмээлээ.
Мөн "Эрдэнэс Монгол компани 89 орон тоотой, 7 газар, 7 хэлтэстэйгээр үйл ажиллагаагаа явуулна. Өнөөдөр томилогдсон гүйцэтгэх захирлыг оролцуулахгүйгээр 88 орон тоонд сонгон шалгаруулалт хийх шийдвэр гарсан. Ур чадвартай мэргэжилтэнтэй, цалин хангамжийн хувьд Монголдоо топ компани байх учиртай. Долоон газрыг долоон ахлах менежер удирдана.
Ахлах менежер буюу бидний хэлдгээр газрын даргын албан тушаалыг хасаж байна. Энэ компанид газрын дарга гэж байхгүй, ахлах менежер удирдана. Өнөөдөр ажиллаж байгаа хүмүүс хэвээрээ байгаа. Гэхдээ бүтэц өөрчлөгдөөд тусгай мэргэжил шаардсан ажлын байрууд бий болж байна. Одоо ажиллаж байгаа ажлын байр нь байхгүй болсон албан хаагчдад чөлөөлөгдөх мэдэгдлийг Эрдэнэс Монгол компанийн зүгээс өгнө. Цаашдаа ДАРГА гэдэг ойлголтыг бүрэн өөрчлөх хэрэгтэй. ДАРГА гэхээрээ тусгай хангамж нэхдэг, өндөр цалин , эрх ямба эдэлдэг ойлголтыг өөрчлөх шаардлагатай" гэв.
2023 оны нэгдүгээр сарын 2-16-ны өдрүүдэд нээлттэй сонгон шалгаруулалтын бүртгэл явагдах ажээ.
