Украины Ерөнхийлөгч Зеленский Польшийн Ржешов хотоос АНУ-ын Агаарын цэргийн хүчний Боинг С-40В (Боинг 737 NG) онгоцоор АНУ-д хүрэлцэн иржээ. Тэрээр лхагва гарагт Вашингтонд хүрэлцэн ирээд Цагаан ордонд АНУ-ын Ерөнхийлөгч Жо Байдентай уулзаж, дараа нь Конгресст үг хэлэв. Зеленский Уинстон Черчиллийн тухай Конгрессменүүдэд сануулж, "Украин тэсч байна, хэзээ ч бууж өгөхгүй" гэж мэдэгдэв.
Зеленскийн айлчлалын албан ёсны хөтөлбөрийн эхэнд Ерөнхийлөгч Байден эхнэрийн хамт Цагаан ордонд уулзлаа.
"Путины явуулж буй харгис хэрцгий дайны эсрэг тэмцэхэд та нартай хамт байгаагаа би нэр төрийн хэрэг гэж үзэж байна" гэж Байден хэлэв.
Байден “Аль хэдийнэ 300 хоног өнгөрч, Путин Украинчуудын үндэстэн болон оршин тогтнох эрхийг бүдүүлгээр зөрчиж, гэм зэмгүй Украины ард түмэн рүү зөвхөн айлгах зорилгоор дайрсан гэдэгт итгэхэд бэрх” гэж нэмж хэлэв.
Путин өвлийг зэвсэг болгон ашиглахыг оролдож байна гэж Байден хэлэхдээ, Оросууд Украины орон сууцны хороолол, эрчим хүчний дэд бүтцийг буудаж байгааг дурдав.
Конгресс дахь АНУ-ын хоёр нам хоёулаа украинчуудыг дэмжиж, Европ, Япон болон бусад холбоотнуудын хамт Украинд нэн шаардлагатай хүмүүнлэгийн болон цэргийн тусламж, тэр дундаа агаарын довтолгооноос хамгаалах "Пэтриот" пуужингийн системийг нийлүүлэх ажлыг үргэлжлүүлнэ гэж Байден Зеленскийд баталжээ.
Хоёр ерөнхийлөгчийн уулзалт хоёр цаг гаруй үргэлжилсэн байна. Уулзалтын дараа хийсэн хэвлэлийн бага хурал дээр Владимир Зеленский хэлэхдээ, "Би хоёр тэрбум ам.долларын цэргийн тусламжийн багцын сайхан мэдээтэй эх орондоо буцаж байна. Энэхүү багцын гол хэсэг нь манай агаарын довтолгооноос хамгаалах чадавхийг бэхжүүлэх "Патриот" систем юм" гэж мэдэгджээ.
Жо Байден хэвлэлийн бага хурал дээр Орос улс өвлийн улиралд Украины дэд бүтцэд цохилт өгч, хүмүүсийг хүйтэн, өлсгөлөнд нэрвэгдүүлж байна" гэж дахин онцолжээ.
АНУ Украинд үзүүлэх тусламжидаа гар татсангүй
Зеленскийн айлчлалын үеэр АНУ Украинд Patriot агаарын довтолгооноос хамгаалах системийг багтаасан шинэ тусламжийн багцыг албан ёсоор зарлав.
АНУ-ын Төрийн департаментын нарийн бичгийн дарга Энтони Блинкен багцын талаар дэлгэрэнгүй ярилаа.
- Багц нь 1.85 тэрбум ам.доллараар үнэлэгдэж байгаа бөгөөд Украины Зэвсэгт хүчинд агаарын довтолгооноос хамгаалах Patriot системийг анх удаа нийлүүлэх болно
- Багцын хоёр дахь хэсэг нь Батлан хамгаалах яамны Украинд тусламж үзүүлэх хөтөлбөрийн хүрээнд олгосон 850 сая доллар юм.
- АНУ-аас Украинд үзүүлсэн цэргийн тусламжийн нийт хэмжээ Жо Байдены засаглалын бүх хугацаанд урьд өмнө байгаагүй их буюу 21.9 тэрбум долларт хүрчээ
- ОХУ-ын цэргийг нутаг дэвсгэрээс нь гаргах хүртэл АНУ дэлхийн 50 гаруй түншүүдтэйгээ хамтран ажиллаж, Украинд шаардлагатай хугацаанд дэмжлэг үзүүлэх болно.
Украинд хичнээн зэвсэг хэрэгтэй вэ?
Дайныг үргэлжлүүлэхэд Украинд ямар их тусламж хэрэгтэй болохыг Украины Зэвсэгт хүчний ерөнхий командлагч Валерий Залужный хэлсэн үгнээс төсөөлж болно. Есдүгээр сард тэрээр Украины Зэвсэгт хүчний довтолгоонд арваас хорин цэргийн бригад буюу хэд хэдэн ажиллагааны бүлгийг байгуулах шаардлагатай гэжээ.
Хоёрдугаар сарын 23-нд мөргөлдөөний шугамд хүрэхийн тулд Украинд 300 танк, 600-700 явган цэргийн байлдааны машин, 500 гаубиц хэрэгтэй гэж тус улсын Зэвсэгт хүчний Ерөнхий командлагч саяхан The Economist сэтгүүлд өгсөн ярилцлагадаа дурджээ.
Эх сурвалж: ВВС
