УИХ-ын чуулганы өчигдрийн нэгдсэн хуралдаанаар Дотоодын цэргийн тухай хуульд нэмэлт, өөрчлөлт оруулах тухай хуулийн төслийг хэлэлцлээ. Уг хуулийн төслийг хэлэлцэх үед цэргийн насны бүх залуусыг цэрэгт татах тухай бодолтой байгаагаа Хууль зүй, дотоод хэргийн сайд Х.Нямбаатар хэллээ. Ард иргэдийг цэрэгжилтэд бэлтгэх ажлын хамрах хүрээг нэмэгдүүлэх саналыг УИХ-ын гишүүн Ж.Чинбүрэн гаргасан ба сайд Х.Нямбаатараас хариулт авав.
УИХ-ын гишүүн Ж.Чинбүрэн иргэддээ цэргийн боловсрол олгох чиглэлд дотоодын цэргийн хүчийг дайчлах, төсөвт мөнгө суулгах хүсэлт гаргасан юм.
Харин Х.Нямбаатар сайд хэлэхдээ "Швейцар, БНСУ гэх мэт улс орнууд хүн бүрийг цэрэгт татдаг. Бид өнөөдөр төсөв санхүүгийн нөхцөл байдлаас шалтгаалж нийт цэргийн насны залуусын тодорхой хувийг л зэвсэгт хүчин, хилийн цэрэг, дотоодын цэрэг, хугацаат цэргийн алба хаагчаар татаж цэргийн боловсрол эзэмшүүлж байна. Израйль улсад эрэгтэй, эмэгтэйгүй цэрэгт татаж, хүн бүрийг адил орчинд байлгаж, төлөвшил олгодог. Цаашид залуучуудыг бүгдийг нь цэрэгт татаж хуарангийн амьдрал үзүүлж, суурь хүмүүжил олгох чиглэлд ажиллах ёстой гэж бодож явдаг" хэмээжээ.
