УИХ-ын чуулганы нэгдсэн хуралдааны үеэр Б.Пүрэвдорж гишүүн Хөшөөтийн уурхайн асуудлаар өөрийн байр сууриа илэрхийллээ.
Тэрбээр “Би сая Ховд аймгийн тойрогтоо ажиллаад ирлээ. Дөрвөн сумаар орж, багийн иргэдтэй уулзахад баруун аймгуудаар цас зуд ихтэй, өвөлжилт хүндрэлтэй байна. Малчдын ихэнх нь ОХУ-аас малын тэжээлээ оруулж ирж байгаа. Тэрнээс нь гаалийн болон НӨАТ-ын татвараас чөлөөлөх талаар арга хэмжээ аваач гэж захисан. Ховд аймгийн Чандмань сумын Сүлжээ багийн иргэн Н.Цэнджаваас Хөшөөтийн уурхайн хүнд суртлаас болж хөлдөж үхэх нь гэх саналыг надад ирүүлсэн. Тус уурхайгаас малчид нүүрс авъя гэхээр хангалттай хэмжээд өгдөггүйгээс болж өвчний уурхай үүсэх нөхцөл бүрджээ.
Энэ жилийн гүйцэтгэлээр Хөшөөтийн уурхай 2.2 сая тонн нүүрс гаргаж байгаа ч аймгийнхаа төсөвт хэдхэн төгрөг оруулж байгаа.
Ингэхдээ тэд бараа бүтээгдэхүүний тайлан гаргахдаа 2-3 дахин үнээр нэмж бичиж, татвараас зайлсхийж, их хэмжээний ашиг олдог. Үүссэн нөхцөл байдалтай холбогдуулан Засгийн газраас Хөшөөтийн уурхайд Бүрэн эрхт төлөөлөгч томилоод, дотоод асуудлыг нь шийдээд өгөөч. Гэтэл Хөшөөтийн уурхайгаас тав дахин их нүүрс гаргадаг “Эрдэнэс Тавантолгой” ХК Монгол Улсыг тэжээхийн зэрэгцээ хулгайч нарыг бас тэжээж байна" хэмээв.
