Ардчилсан намын дарга С.Эрдэнэ цаг үеийн асуудлаар өнөөдөр Төрийн ордонд мэдээлэл хийлээ.
Ардчилсан намын дарга С.Эрдэнэ мэдээлэл хийхдээ “Нүүрсний хулгайтай холбоотой төрийн өндөр албан тушаалтнуудыг нам харгалзахгүй шалгаж гэм бурууг нь тогтоож, хуулийн хариуцлага хүлээлгэн улсад учруулсан хохирлыг төлүүлэхийг эрх баригчдаас, хууль хяналтын байгууллагуудаас шаардаж байна. УИХ-ын дарга Г.Занданшатар тэргүүтэй эрх баригчид Ардчилсан намын дотоод асуудалд улс төрийн ашиг сонирхлоор хандаж УИХ дахь АН-ын бүлгийн даргыг хуйвалдааны аргаар өөрчлөх оролдлогыг хийж ирлээ. УИХ-ын гишүүн О.Цогтгэрэл бусад нэр бүхий гишүүд нь АН болон УИХ дахь АН-ын бүлгийг төлөөлөх эрх зүйн чадамжгүй болохыг дахин албан ёсоор хэлье.
Нүүрстэй холбоотой мөн төмрийн хүдэр, зэс, алт бусад уул уурхайн баялаг дээр хийгдсэн хууль бус гэрээнүүд дээр Ардчилсан нам ажиллаж байгаа гэдгийг хариуцлагатай мэдэгдье. Ард иргэд Сүхбаатарын талбай дээр жагсаж үзэл бодлоо илэрхийлсэн. Энэ асуудалд АН шууд оролцох биш ажиглалтын байдалтай оролцсон. Ард иргэдийн жагсаал цуглааныг ашиглах гэсэн улс төрийн бүлэглэлүүд байсан учир шууд оролцохоос зайлсхийсэн.
Өчигдрийн нээлттэй сонсгол дээр иргэдийн үзэл бодлоо илэрхийлсэн үйлдлийг АН-тай холбох гэсэн мэдээллүүд явж байгаа харагдсан. Нээлттэй сонсголд Ардчилсан намын төлөөлөл албан ёсоор оролцоогүй гэдгийг албаг ёсоор мэдэгдье" хэмээв.
