Засгийн газар өнгөрсөн баасан гарагт хуралдаж, хэд хэдэн шийдвэр гаргасны нэг нь Өмнөговь аймаг дахь жижиг Тавантолгой ХК-д бүрэн эрхт төлөөлөгч томилсон шийдвэр. Бүрэн эрхт төлөөлөгчөөр ХЗДХЯ-ны Төрийн нарийн бичгийн дарга П.Сайнзориг ажиллах бөгөөд тэрбээр баасан гарагт нисдэг тэргээр Өмнөговь аймагт газардаж, ажлаа хүлээн авсан юм.
Тус компани нүүрсний хулгайтай холбоотой асуудалд оролцсон байж болох тухай яригдсан ба хоосон машин хилээр гарсан, Эрдэнэс Тавантолгой ХК-иас алдагдсан мөргөцөгийн асуудал зэрэгтэй холбогдсон асуудал үүссэн учир Засгийн газраас бүрэн эрхт төлөөлөгч томилсон.Бүрэн эрхт төлөөлөгч ажилдаа шуурхайлан орсон бөгөөд дараа гурван чиглэлээр ажиллаж эхэлжээ.
Нэгдүгээрт гэрээ. Засгийн газрын өнгөрсөн баасан гарагийн хуралдааны шийдвэрээр Эрдэнэс Тавантолгой ХК-иас хэрэгжүүлж төрийн нууцад байсан есөн гэрээг ил болголоо. Харин энэ удаа Хятадын компаниудтай холбоотой гэрээг ил болгох саналыг БНХАУ-ын талд тавиад хариу ирээгүй хүлээж байна.
Нүүрсний хулгайч нарыг илрүүлж, хариуцлага тооцохыг хүссэн жагсагчдын тавьсан нэг шаардлага нь гэрээг ил болгох тухай байв. Засгийн газар нүүрсний хулгайчдыг тогтоох асуудлаар шуурхай ажиллаж эхэлсэн нь нууц гэрээг олон түмэнд ил болгосноор илэрч байна. Нууц гэрээг эхнээс нь Эрдэнэс Тавантолгой компани олонд дэлгэж байна.
Засгийн газраас цаашид энэ мэт бүтээн байгуулалтын төслүүдийг ҮАБЗ-ийн зөвлөмжөөр нууцад авдаг байдлыг таслан зогсооё. Цаашид Монгол Улсын Засгийн газар нэг ч нууц гэрээг батлахгүй гэсэн зарчмын шийдэлд хүрсэн. Нууц гэрээтэй холбоотой мэдээллийг хариуцсан байгууллагууд дэс дараатайгаар олон нийтэд хүргэнэ гэж ЗГХЭГ-ын дарга Д.Амарсайхан мэдэгдсэн.
Хоёрдугаарт тээвэр. ХЗДХ-ийн сайд Х.Нямбаатар нүүрсний хулгайг илрүүлэх чиглэлд хууль хяналтын байгууллагынхан үе шаттай шалгалтуудыг бүх түвшинд хийж байна. Нүүрсний тээврийн бизнесийн ард эрх мэдэл, албан тушаалтай хүмүүс байгаа эсэхийг нягтлахын тулд 9000 жолоочийн ард хэн байгаа хамаарлыг тогтооно хэмээн хэвлэлийн хурлын үеэр болон Ерөнхийлөгч У.Хүрэлсүхэд илтгэж байв.
Өмнөговь аймагт ЦЕГ-ын мөрдөн байцаагч нараар ахлуулсан өргөтгөсөн ажиллаж байгаа. Тэд нүүрсний тээвэр хийдэг 9000 жолоочоос мэдүүлэг авч ямар компанийн нэр дээр тээвэр хийдэг болон ковидын үед яригдаж байсан бөмбөлгийн асуудлаар шалгалтыг ажиллагаа явуулж дуусжээ. Тээвэр хийдэг 9000 жолоочийн хамаарлыг өнөөдөр олон нийтэд зарлахаар ажиллаж байгааг албаны эх сурвалж мэдээлэв.
Гуравдугаарт мөргөцөг. Жижиг Тавантолгойд томилсон бүрэн эрхт төлөөлөгч П.Сайнзоригийн хүлээсэн нэг чухал үүрэг нь алдагдсан нүүрс буюу мөргөцөг. Алдагдсан мөргөцгийн асуудлаар шалгалтаа эхлүүлсэн ба нүүрс олборлох хөрс хуулалтын ажлаас эхлээд хилээр гарсан машин, ачааны зөрүү зэрэгт төвлөрөн ажиллаж эхэлжээ.
