УИХ-ын чуулган хуралдаж байна. УИХ-ын гишүүд цаг үеийн асуудалтай холбогдуулан байр сууриа илэрхийллээ.
УИХ-ын гишүүн Б.Пүрэвдорж :
Нүүрсний хулгай гэх асуудлыг би хоёр жилийн өмнөөс ярьсан. Хулгай байна гэдгийг хэлээд байхад Эрдэнэс Тавантолгой ХК-ийн захирал Б.Ганхуяг намайг хоёр удаа цагдаад өгсөн. Манайх ариухан цэвэрхэн компани гэсэн ч өнөөдөр үнэнд гүйцэгдэж байна.
6,4 сая тонн нүүрс хулгайгаар гарсан. Өртөг нь 6,5 тэрбум доллар гээд УИХ-ын гишүүн Доржханд ярьж байна лээ. 6.4 сая тонн нүүрсийг 1000-аар үржүүлж байж, 6,5 тэрбум ам.доллар болно биз дээ. 1000 долларын үнэтэй нүүрс гэж хаана байна вэ. Эрх баригчидтай нийлээд баахан өндөр тоо тавьдаг. Араас нь эрх баригчид 40 их наяд, 400 их наяд төгрөг гээд баахан том тоо ярьдаг. Нүүрсний хулгайг замхруулах гэж л ийм юм ярьж байна. 6.4 сая тонн нүүрс гэдэг чинь 64 мянган машинаар зөөнө. Тэгэхээр тэнд байгаа 9000 жолооч, гаалийнхан, хилийнхэн бүгдийг нь хулгайч гээд замхруулах л ажил хийж байна. Үүний ард тээврийн хулгай, оффтейк гэрээ, гэрээний хулгай гурваа нуун далдлах гээд байна. Зөвхөн тээврийн зардал дээр 7 их наяд төгрөгийн зөрүү гарсан байгаа. Б.Жавхлан сайдаас энэ тухай тодруулга авах гээд чадсангүй.
Оффтейк гэрээний хувьд Зүүнбаянгаас Тавантолгой, Тавантолгойгоос Гашуунсухайт хүртэл хоёр гэрээ, Тавантолгойн нүүрсний баяжуулах үйлдвэрийн гэрээ, Тамсагийн нефтийн хоолойн гэрээ гээд үнийн хувьд дандаа хоёр дахин үржүүлсэн гэрээнүүд. Жишээ нь, Тавантолгойгоос Гашуунсухайт хүртэл замыг Голомтын Баясгалан 2 сая доллараар барьчихаад 4.5 саяын оффтейк гэрээ байгуулсан. Дээрээс нь нүүрс гэрээлсэн. Нүүрсээ 60 доллараар авчихаад цаашаа хэдэн зуун доллараар зарсан. Тэрний гэрээг зогсоогооч, өртгийг нь шалгаач.
Гэрээний хулгай гэхэд Тавантолгойн Ганхуяг дээр УИХ-ын гишүүд, сайд дарга нар хуулийнхан очоод 100,200 мянгын гэрээ байна. Энийг зураад өгөөч гэдэг. Нөгөөх нь яах гэж байна вэ гэхээр дундаас нь 2 ам.доллар авмаар байна гэдэг. Ийм л юм хийдэг шүү дээ. 2017 оноос хойш 100 сая тонн нүүрс гарсан гэхээр багаар 400 сая ам.долларын асуудал байна. Тийм учраас Ганхуяг чинь пээдийсэн хэвээр байгаа юм. Тиймээс Ганхуягт зөвлөхөд нүүрсний хулгайтай холбогдсон бүх хүнийг нэрлэ гэж зөвлөе. Тэгвэл би ялыг нь хөнгөлөх талаар өөрөө санаачлаад ярьж өгье гэдгээ хэлье.
