Энэ сарын 1-нээс эхэлж торгуультай тээврийн хэрэгслийг товчоодоор нэвтрүүлэхгүй байх шийдвэрийг Нийслэлийн засаг даргын зөвлөлийн хурлаар шийдвэрлэсэн. Гэхдээ одоогоор журам батлагдаагүй учраас дээрх шийдвэр хэрэгжиж эхлээгүй байна. Тиймээс журам батлагдтал товчоодоор орон нутгийн тээврийн хэрэгсэл шууд нэвтэрнэ гэсэн үг юм. Одоогоор техникийн ажлууд л хангагдсан гэж хэлж болно.
Журам батлагдвал:
- Зам ашигласны төлбөр татвараа төлөөгүй,
- Техникийн үзлэг оношилгоонд ороогүй тээврийн хэрэгслийг нийслэл рүү нэвтрүүлэхдээ авто тээврийн товчоодод төлбөрийг нь төлүүлнэ.
Харин замын хөдөлгөөний дүрэм зөрчсөн торгуулиа төлөөгүй тээврийн хэрэгслийн тухайд шинэ журам боловсруулж гарах хүртэл товчоодоор нэвтрэх боломжтойг нийслэлийн Сургалт судалгаа, олон нийттэй харилцах газар мэдээлэв.
