Нийслэлийн газар зохион байгуулалтын албанаас ирэх сарын 2-нд газрын энэ жилийн сүүлийн цахим дуудлага худалдаа явуулах гэж байна. Энэ талаар НГЗБА-ны Газар зохион байгуулалт, төлөвлөлтийн хэлтсийн мэргэжилтэн О.Батчимэгээс тодрууллаа.
-Цахим дуудлага худалдаагаар ямар зориулалтын газруудыг санал болгож байна вэ?
-НИТХ-ын 2022 оны 66 дугаар тогтоолоор батлагдсан нийслэлийн 2022 оны газар зохион байгуулалтын төлөвлөгөөний нэмэлт өөрчлөлтөд дуудлага худалдааны зарчмаар шинээр эзэмшүүлэх, ашиглуулахаар 41 байршил тусгасан. Энэхүү 41 байршлаас харилцаа холбоо, мэдээллийн технологийг өсөн нэмэгдүүлэх зорилгоор холбоо, мэдээлэл хүлээн авах станцын зориулалтаар 22 байршил төлөвлөсөн.
-Газрын биржийн цахим системийн давуу тал нь юу вэ?
-Олон нийтэд нээлттэй, ил тод, шударга, хурдан шуурхай, заавал биечлэн очих шаардлагагүй, хаанаас ч оролцох боломжтой зэрэг давуу тал ихтэй. Иргэн газар авахыг зорьсон, шаардлага хангасан л бол хүссэн газраа авах боломж нээлттэй. Иргэн, хуулийн этгээд цахим дуудлага худалдаанд оролцох хүсэлтээ цахимаар илгээх бөгөөд улсын тэмдэгтийн хураамж төлсөн баримт, дэнчингийн мөнгө тушаасан баримт, иргэний үнэмлэх болон улсын бүртгэлийн гэрчилгээний хуулбарыг тус тус илгээнэ. Мөн иргэд өмчилсөн газраа www.mle.mn цахим хуудсаар дамжуулан борлуулах боломжтой.
Энэ хуудсанд бичиг баримтын зөрчилгүй газрын бүх зарыг хүлээн авах тул илүү баталгаатай гэсэн үг. Газраа борлуулж буй иргэн өөрийн газрын байршлаа дээр дурдсан 16 бүсийн аль хэсэгт байгааг харж, дуудлага худалдааны анхны үнэтэй харьцуулах, зах зээлийн үнэлгээгээ тогтоох боломжтой.
-Газрын анхны үнийг хэрхэн тогтоодог вэ?
-Засгийн газрын 2018 оны 182-р тогтоолоор Газрын үнэлгээний тойрог, зэрэглэл (бүс), суурь үнэлгээг тогтоосны дагуу БХБ-ын сайдын 2018 оны 208 тушаалаар батлагдсан аргачлалыг баримтлан газрын суурь үнийг нийслэлийн нутаг дэвсгэрийг 16-н бүсэд хувааж, газрын хэмжээ, зориулалтаас хамаарч харилцан адилгүй итгэлцүүрээр тооцож, дуудлага худалдааны анхны үнийг тогтоодог. БХБ-ын сайдын тушаалаар итгэлцүүрийг тогтоохдоо тухайн газрын төвөөс алслагдсан байдал, дэд бүтэц, зам харилцаа, нийгмийн үйлчилгээ, хүн амын төвлөрөл гэх мэт хүчин зүйлийг тооцон тогтоосон байдаг.
-Энэ ирэх сарын 02-нд болох цахим дуудлага худалдааны тухайд?
-Ээлжит газрын цахим дуудлага худалдааг 21 байршилд 2022 оны 11 дүгээр сарын 2-ны өдөр зохион байгуулна. Оролцогч хүсэлтээ www.mle.mn газрын цахим биржийн системээр дамжуулан 2022 оны 10 дугаар сарын 26-ны өдрөөс 11 дүгээр сарын 01-ний өдрийн 15 цаг хүртэл бүртгүүлэх боломжтой юм.
Дуудлага худалдаа 09.00 цагт үнийн саналыг хүлээн авч эхэлнэ. Санал авах сүүлийн хугацаа 15.00 цагт дуусмагц систем 1 минут хүлээх бөгөөд тухайн мөчид аль нэгэн оролцогч үнийн санал өгөхгүй бол дуудлага худалдааг автоматаар хааж, хамгийн сүүлд өндөр үнийн санал ирүүлсэн оролцогч газраа авна. Хэрэв нэг минутад оролцогч үнийн санал илгээвэл дахин нэг минут хүлээх зарчим баримтална. Дээрх зарчмаар 17.00 цаг хүртэл үргэлжилсэн тохиолдолд хамгийн сүүлийн үнэ өгсөн оролцогч ялагч болно. Зарим оролцогч би 15.00 цагт үнийн саналаа илгээсэн байхад яагаад ялагч болсонгүй вэ гэсэн асуудал тавьдаг. Гэтэл хүлээлтийн нэг минутад өөр оролцогч санал ирүүлж, газрыг авсан тохиолдол бий. Тэгэхээр иргэд дээрх зарчмыг сайтар ойлгох хэрэгтэй.
Иргэн аж, ах ахуйн нэгжүүд нийслэлийн 2023 оны газар зохион байгуулалтын төлөвлөгөөнд www.egazar.gov.mn газрын цахим системийн төлөвлөгөөний санал хэсэгт хандан хүсэлтээ ирүүлэх боломжтой.
-Үнийн саналаа өгсний дараа өөр хүн илүү үнэ ирүүлснийг яаж мэдэх вэ?
-www.mle.mn цахим хуудсанд тухайн байршилд ирсэн үнийн саналууд тухай бүрт нь гарна. Гэхдээ оролцогчийн нэр биш сайтад бүртгүүлсэн дугаар нь үнийн саналын хамт харагдана.
-Оролцогчид өөр юунд анхаарах шаардлагатай вэ?
-Иргэн, аж ахуйн нэгж www.mle.mn цахим хуудсанд хандаж иргэний үнэмлэх, байгууллага бол гэрчилгээ, улсын тэмдэгтийн хураамж болох 12 мянга 500 төгрөг, дэнчингийн мөнгөө тушаасан баримтаа скайнердаж оруулна. Цагийг нь тулгаж хүсэлт илгээсэн тохиолдолд Төрийн санд дэнчингийн мөнгө болон улсын тэмдэгтийн хураамж төлсөн тухай мэдээлэл нь орохгүй удах тохиолдол бий.
Ингэснээр тухайн хүний мэдээллийг баталгаажуулахад хүндрэл үүснэ. Тиймээс хэрвээ та дуудлага худалдаанд оролцох гэж байгаа бол 23-ны 09:00 цагийг хүлээхгүйгээр хүсэлтээ илгээх хэрэгтэй. Дуудлага худалдаанд ялагч болсон иргэн долоо хоногийн дотор манай байгууллагад ирж, гэрээ байгуулах, ялагч болсноосоо хойш 14 хоногийн дотор газрынхаа үнийг бүрэн төлөх ёстой. Төлөхгүй бол гэрээ хүчингүй болохоос гадна дэнчингийн мөнгийг буцаан олгохгүй.
-Дараагийн цахим дуудлага хэзээ болох вэ?
-Ирэх сарын 16-ны өдрийн 09:00 цагт зохион байгуулагдана. Иргэн, аж ахуйн нэгж байгууллагад ил тод нээлттэй, энгийн хялбар зохион байгуулагддаг болно. Мөн иргэн аж, ах ахуйн нэгжүүд нийслэлийн 2023 оны газар зохион байгуулалтын төлөвлөгөөнд www.egazar.gov.mn газрын цахим системийн төлөвлөгөөний санал хэсэгт хандан хүсэлтээ ирүүлэх боломжтой.
