Засгийн газрын өчигдрийн хуралдаанаар Мэргэжлийн хяналтын ерөнхий газрыг татан буулгаж, салбар яамдад чиг үүрэг нь шилжихээр болов. ЗГХЭГ-ын дарга Д.Амарбаясгалан “Ажил аваад олон нийтэд мэдэгдсэнийхээ дагуу Мэргэжлийн хяналтын байгууллагын тогтолцоо, зохион байгуулалтыг өөрчилж, хяналт шалгалтыг салбар бүрт нь шилжүүлэх ажлаа шат дараатай хийж байна. Шинэ сэргэлтийн бодлогын баримт бичгийн Төрийн бүтээмжийн сэргэлт дэх төрийн хяналт, шалгалтын давхардсан тогтолцоог цэгцлэх, төрийн зарим чиг үүргийг хувийн хэвшил, мэргэжлийн холбоодод шилжүүлэх ажлын хүрээнд уг зохион байгуулалтыг хийж байгаа” гэсэн. Өөрөөр хэлбэл төрийн хяналт, шалгалтын давхардцсан тогтолцоог цэгцлэх нь энэ ажлын гол зорилго байсан гэж харагдаж байгаа юм.
МХЕГ-ын 800 байцаагч чиг үүргийнхээ дагуу салбар яамд руу шилжин ажиллана. Гэхдээ 2023 оны 1 дүгээр сарын 1-ний өдрөөс Засгийн газрын хяналт шалгалтын агентлагийн байгуулахаар төлөвлөсөн гэдгийг Засгийн газраас танилцуулсан. Энэ агентлаг нь МХЕГ-аас ялгарах нь төрийн байгууллагуудтай холбоотой шийдвэрүүдийг хэрхэн хэрэгжүүлж байгаа болон албан хаагчдын мэргэжлийн ёс зүй, ажлын хариуцлагын байдал хяналт шалгалт хийх чиг үүрэгтэй байх бололтой.
Үнэхээр хяналт, шалгалтын чиг үүргийг салбар яамдад шилжүүлж байгаа бол шинээр байгуулахаар төлөвлөөд байгаа агентлагийн чиг үүрэг ч Төрийн албаны зөвлөл дээрээ байх ёстой харагдаж байна. Өөрөөр хэлбэл, Төрийн албаны зөвлөл хэмээх УИХ-ын харьяа байгууллагад цөөнгүй тооны төрийн албан хаагч дээрх асуудлыг хариуцаад төсөв мөнгө тавиулаад суудаг биш бил үү. Төрийн албаны зөвлөлд Төрийн албаны тухай хуулиар олгогдсон төрийн албанд шударга ёсны зарчмыг хэрэгжүүлэх, хууль тогтоомжуудын биелэлтийг зохион байгуулах, төрийн байгууллагуудын үйл ажиллагааг зохицуулсан стандартын хэрэгжилтийг шалган зааварлах, зөрчлийг арилгуулах, гүйцэтгэлд нь хяналт тавих, маргааныг хянан шийдвэрлэх гэх мэт чиг үүрэг нь байдгийг танилцуулгаас нь харж болно. Мөн төрийн албан хаагчдын ёс зүйтэй холбоотой асуудлыг шийдвэрлэх ёс зүйн зөвлөл байгууллага бүр дээр ажиллаж, Төрийн албаны зөвлөл дээр өргөдөл гомдол хүлээн авч шийдвэрлэдэг хэлтэс алба хүртэл ажилладаг. Тэгэхээр хэрвээ төр үнэхээр хэмнэх гээд байгаа бол энэ мэт давхардсан чиг үүрэг, үйл ажиллагаануудаа ойлгомжтой болгох хэрэгтэй биш үү. 2023 оны төсвийн төсөлд Төрийн албан зөвлөл дээр 3 тэрбум 589 сая төгрөг тавигдсаныг бодоход ямар ч байсан энэ байгууллага ирэх жил хуучин бүтэц бүрэлдэхүүнээрээ ажиллах нь.
ЗГХЭГ-ын дарга Д.Амарбаясгалангийн Засгийн газрын тухай хуулиар олгогдсон чиг үүрэгт төрийн албаны хүний нөөцийн асуудал, орон нутгийн засаг захиргааны зохион байгуулалт, удирдлага, Засаг даргын үйл ажиллагааг удирдлага, зохицуулалтаар хангах зэрэг багтдаг. Тэгэхээр шинээр байгуулахаар төлөвлөсөн Засгийн газрын хяналт шалгалтын агентлаг нь түүний харьяанд байх нь тодорхой.
Эндээс харвал УИХ-ын харьяанд Төрийн албаны ажлын гүйцэтгэл, төрийн албан хаагчийн ёс зүй, шударга ёсны зарчмыг хэрэгжүүлэх үүрэгтэй Төрийн албаны зөвлөл, ЗГХЭГ-ын харьяанд мөн л төрийн байгууллагуудын үйл ажиллагаанд, албан хаагчдын ёс зүй сахилга хариуцлагад хяналт тавьж, шалгалт хийх үүрэгтэй Засгийн газрын хяналт шалгалтын агентлаг гэгч ажиллах нь. Засгийн газрын хэрэг эрхлэх газар Төрийн албаны зөвлөлийн үйл ажиллагааг хангалтгүй гэж үзэж байгаа учраас хуулиар хүлээсэн чиг үүргийнхээ хүрээнд хажуудаа бас нэг “төрийн албаны зөвлөл” ажиллуулахаар болжээ гэх өнцөг харагдаж байгаа нь илт.
Уг нь, Л.Оюун-Эрдэнийн Засгийн газар шинэ бүрэлдэхүүнээр ажиллах болсон эхний өдрөөсөө Төрийн хэмнэлтийн тухай хуулийн хэрэгжилтийг ярьсан. ЗГХЭГ-ын дарга Д.Амарбаясгалангаас ахлуулсан ажлын хэсэг хүртэл гарч, хуулийн хэрэгжилтэд үнэлэлт дүгнэлт өгч, амьдралд ойртуулахад анхаарна гэсэн мэдээлэл хийж байв. Гэвч үнэндээ, төрийн албаны чиг үүргийн давхардлыг цэгцлээгүй цагт Төрийн хэмнэлтийн тухай хуулийн хэрэгжилтийн талаар ярих нь илүүц биз.
Эх сурвалж: Toim.mn
