Энэ сарын 10-ны өдөр 7 машин мөргөж, 2 хүүхэд ноцтой гэмтээсэн талаар хэргийн нууц өнөөдрийг хүртэл задраагүй байна. Тэгвэл энэ хэргийн ард ямар нэгэн эрх баригч байж ч болох юм гэж иргэд хардаад байна. Тухайн хэрэгт холбоотойгоор иргэн Э.Энхзориг Хууль зүйн яамнаас хэрэгт холбоотой мэдээллийг ил болгохыг шаардсан бичиг хүргүүллээ.
Тэрбээр “Миний хувьд ослын бичлэгийг хайж Олимп хотхоны хавьд очсон. Бичлэг хийх боломжтой 2 камер байсан ч осол болсон орой хяналтын камерын хардыг нь аваад явчихсан байсан. Тухайн үед осолд орсон долоон машины эзэд өнөөдрийг хүртэл яагаад чимээгүй байна. Осол гаргасан “Ланд 200” маркийн автомашинд мөргүүлсэн “Приус 41” маркийн машин айлын хашаанд байгаа. Машины эзэн дунд гарын Лексус авсан талаар мөргүүлсэн машины эзний эгч хэлсэн” гэсэн мэдээлэл өглөө.
Харин тээврийн цагдаагийн албанаас өнөөдөр Прокурорын зүгээс камерын бичлэгийг олон нийтэд задлах боломжгүй гэдгийг хэллээ. Мөн Шүүх эмнэлгийн дүгнэлтээр 12 настай хохирогч охины гэмтэл хөнгөн зэрэгт хамаарна гэж гарсан талаар мэдээллээ. Мөн уг осолд өртсөн долоон тээврийн хэрэгсэлд 117 сая төгрөгийн хохирол учирсан гэж мэдээлжээ.
Г.Бүжинлхам
