Ардчилсан намын бүлгээс өнөөдөр цаг үеийн асуудлаар мэдээлэл хийлээ. АН-ын бүлгийн дарга О.Цогтгэрэл "Эрх баригчдын гаргасан эдийн засгийн төсөв үнэнд гүйцэгдэж байна. Тэд эдийн засгийг 2019 оны түвшинд яаж авч ирэх вэ гэдгийг л ярьж байна. Зүгээр л 3 жилийн өмнөхдөө хэрхэн яаж очих вэ гэдэг талаар бодлого барьж байна. Экспортоор мөнгө олох ажлыг маш муу хийж байна. Харин нэг зүйлийг сайн хийж байна. Өр зээл тавьж, улс орныг өрөнд оруулж асуудлыг гацааХ АЖЛЫГ маш сайн хийж байна. Монгол улсын эдийн засгийн тогтолцоо, төржсөн эдийн засгийн тогтолцоо руу жилээс жилд маш амжилттай шилжиж байна.
Сонгуульд ялж байвал хамаагүй гээд халамжийг хавтгайруулж байна. Монгол Улсын хөгжлийг халамж гэдэг зүйл хойш татаж байна. Халамж муухай гэдэг утгаараа биш. Харин халамж зорилтот эзэндээ очиж байна уу, хавтгайрч байна уу гэдэг нь чухал. Мөн халамжаас дутуугүй эдийн засгийг гажуудуулж байгаа зүйл байна. Тэр бол ТАТААС. Монголын эдийн засагт татаас гэдэг аюултай нуугдмал зүйл байсаар байна. Төрийн эдийн засаг дахь оролцоо улам нэмэгдэж байна гэсэн үг. Одоогийн байдлаар үзэхэд хүүхдийн мөнгийг оруулахгүйгээр 580 тэрбум төгрөгийг төсөвт халамж хэлбэрээр тусгаж байна. Гэтэл бидний харахгүй, хайхрахгүй байсан татаас гэдэг зүйл төсөвт 985 тэрбум төгрөг буюу нөгөө халамжаасаа 50 хувиар илүү тусгагдсан байна” гэлээ.
Г.Бүжинлхам
