Хөвсгөл аймгийн “Бэлтэс мөрөн” компани бусдын мөнгийг 15-100 хувийн хүүтэй өсгөж өгнө хэмээн хууран мэхлэх замаар их хэмжээний мөнгө татан төвлөрүүлж, иргэдэд хохирол учруулсан хэргийн талаар Цагдаагийн Мөрдөн байцаах албанаас мэдээлэл хийлээ.
Тус албанаас мөрдөн шалгах үйл ажиллагаа явуулж, “Бэлтэс мөрөн” компанийн үйл ажиллагааг зогсоож, удирдлагуудыг Эрүүгийн хэргийн 17 зуйлийн 3.3-аар эрүүгийн хэрэгт яллагдагчаар татаж, цагдан хориод байгаа юм. Шалгалтаар нийт 13 мянган иргэнээс мөнгө татан төвлөрүүлсэн бөгөөд одоогийн байдлаар 2549 иргэнд 45,3 тэрбум төгрөгийн хохирол учруулсан байна. Компанийн удирдлагуудын нэр дээр байсан 13 тээврийн хэрэгсэл, 12 үл хөдлөх хөрөнгийг өнөөдрийн байдлаар битүүмжлэн, хураан авч, шалгалтын ажиллагаа үргэлжилж байгаа гэв. “Бэлтэс мөрөн” компаниас 1600 иргэн мөнгөө өсгөх нэрийдлээр 12,1 тэрбум төгрөг авсан байна. Мөрдөн байцаах албанаас тэдгээр иргэдийн иргэний хариуцагчаар татан өсгөн авсан гэх мөнгийг эргүүлэн татахаар ажиллаж байгаа гэсэн мэдээлэл өгөв.
