Эсэргүүцэгчид улсынхаа далбааг шатаав
Ёс суртахууны зөрчил гаргасан гэж буруутгагдан цагдаад саатуулагдсан оюутан охин нас барсны дараа долоо хоногийн өмнө эхэлж, Ираны бараг бүх мужийг хамарсан эсэргүүцлийн жагсаалыг "шийдвэрлэхэд" бэлэн байгаагаа Ираны ерөнхийлөгч Эбрахим Раиси мэдэгдэв.
Албан ёсны мэдээгээр жагсагчид цагдаа нартай мөргөлдсөний улмаас 35 хүн амиа алдсан байна. Ираны хотуудад болсон мөргөлдөөний дүрс бичлэг олон нийтийн сүлжээгээр тархсан. Пираншар, Махабад, Урмиа хотод аюулгүй байдлын хүчнийхэн жагсагчид руу буудаж байгааг харуулжээ. Жинхэнэ сум ашигласан байх магадлалтай байна.
Хүний эрхийн төлөө тэмцэгч Эмнести Интернэшнлийн мэдээлснээр зөвхөн лхагва гаригт гэхэд л Ираны аюулгүй байдлын албаныхан 19 жагсагчийг хөнөөсөн бөгөөд тэдний гурав нь насанд хүрээгүй хүүхэд байжээ. Ираны аюулгүй байдлын албаныхан байлдааны сумыг системтэйгээр ашиглаж байгааг нотлох баримт байгаа гэж ТББ-ын төлөөлөгч мэдэгдэв.
Эрх баригчдын хатуу хариу
Эсэргүүцэгчдэд Ираны дэглэм хатуу ширүүн хариу үйлдэл үзүүлэв. Даваа гарагаас хойш Иранд 11 сэтгүүлч саатуулагджээ. Мөн баривчлагдсан жагсагчдын тоо хэдэн зуу байна. Зөвхөн баруун хойд Гуйлан мужид л гэхэд өнгөрсөн бямба гарагийн байдлаар 739 хүн баривчлагдсаны 60 нь эмэгтэй байна.
Тэдний нэг нь олон зуун хүнийг давчуу өрөөнд бөөнөөр хорьж зодож цохиж байгаа талаар эх сурвалжид мэдээлжээ.
Жагсагчид зарим хорооллыг түр хяналтандаа авсан гэж баруун зүгийн Ошневие хотын эх сурвалжууд ВВС-д нотолсон байна. Эндээс цагдаагийн албан хаагчид зугтсан ч бямба гаригт дахин буцаж ирсэн гэж нутгийн иргэд ярьжээ.
Харин Ираны ерөнхийлөгч Эбрахим Раиси мэдэгдэлдээ эсэргүүцлийн жагсаалыг "үймээн самуун" гэж нэрлэжээ. Жагсагчид төрийн мэдлийн хагас цэрэгжүүлсэн Басиж бүлэглэлийн гурван төв байрыг эзлэн авсан гэх мэдээллийг тус улсын хэвлэл мэдээллийнхэн үгүйсгэв.
АНУ-ын Төрийн департаментын нарийн бичгийн дарга Энтони Блинкен хэлэхдээ, Иранчууд "тусгаарлагдсан мэт санагдахгүй" байлгахын тулд АНУ Ираны интернетэд тавьсан хоригоо зөөлрүүлнэ гэжээ.
Махса Аминигийн үхэл
Ираны цагдаад баривчлагдсан Махса Амини охин нас барсны дараа тус улсыг бүхэлд нь хамарсан эсэргүүцлийн жагсаал эхэлсэн юм.
Махса Амини
Курд үндэстэн Махса Амини эмэгтэйчүүдийг үсээ хижаб эсвэл ороолт, гар, хөлөө задгай хувцасаар халхлах хуулийг зөрчсөн хэргээр Тегеранд баривчлагдсан байна.
Баривчлагдсаныхаа дараахан Амини комд орж, гурав хоногийн дараа эмнэлэгт нас баржээ. Эрх баригчдын мэдээлснээр нас барсан шалтгаан нь зүрх зогссон байна. Гэвч Аминигийн ойр дотныхон нь түүний зүрх хэзээ ч өвдөж байгаагүй гэжээ. Охиныг зодсоны улмаас нас барсан гэж тэд сэжиглэж байгаа юм.
"Тэд худлаа ярьж байна" гэж Махса Аминигийн эцэг хэлсэн бөгөөд Аминигийн аав охиныхоо задлан шинжилгээнд орох эрхгүй гэж мэдэгджээ. Тэрээр ВВС-д өгсөн ярилцлагадаа охиноо эрүүл мэнд төгс, эмх цэгцтэй нэгэн байсан гэж нотолжээ.
Эх сурвалж: ВВС
