Германы Холбооны Улсын Доод Саксон мужийн Ерөнхий сайд Штефан Вайл "Хойд урсгал 2" хийн хоолойг хэзээ ч ашиглалтад оруулахгүй гэж үзэж байна.
Вайлл даваа гарагт нийтлэгдсэн DPA агентлагт өгсөн ярилцлагадаа "Итгэлцэл үндсээрээ алдагдаж, Германы холбооны засгийн газар Оросоос эрчим хүч авахаар бооцоо тавих нөхцөл байдал дахин хэзээ ч гарахгүй" гэж хэлэв. "Хойд урсгал 2" хэзээ ч ашиглалтад орохгүй гэдэгт бүс нутгийн тэргүүн итгэлтэй байна.
Доод Саксоны Ерөнхий сайд мөн ерөнхийдөө эрчим хүчний салбарт Герман-Оросын хамтын ажиллагаа цаашид боломжгүй болсон гэж үзэж байна. "Энэ хамтын ажиллагаа эргэлт буцалтгүй сүйрсэн. Барууны орнууд энэ байдлаас Оросоос илүү хурдан сэргэх болно" гэж Вайлл мэдэгдэв.
Өнгөрсөн баасан гарагт Узбекистанд хийсэн айлчлалынхаа дараа сэтгүүлчдийн асуултад хариулах үеэрээ ОХУ-ын Ерөнхийлөгч В.Путин “Эцсийн эцэст бүх зүйл тийм хэцүү, тэвчих аргагүй байгаа бол "Хойд урсгал-2"-ын эсрэг авсан хориг арга хэмжээгээ цуцалчих. Тэгсэн тохиолдолд нэг товчлуур дарахад л бүх зүйл бүтэж, жилд 55 тэрбум шоо метр хий урсана" гэж тодотгожээ.
Герман улс Украинд явуулж байгаа Оросын тусгай ажиллагаатай холбогдуулан ОХУ-ын эрчим хүчний нөөцөөс хараат байдлаа бууруулахаар шийдсэн. Эрх баригчдын төлөвлөгөөний дагуу жилийн хугацаанд нүүрс, газрын тосноос татгалзахаар төлөвлөж байгаа ч ирэх жил ОХУ-аас хий авах шаардлагатай болно. Гадаад хэргийн сайд Анналена Бурбокийн хэлснээр одоо Герман дахь Оросын байгалийн хийн эзлэх хувь 6-8 хувь болж буурчээ.
Хийн нийлүүлэлт багасч байгаа энэ үед Герман улс эрчим хүчний хямралын аюулд өртөж байна. 8-р сарын 24-нд Германы Засгийн газар өвлийн улиралд эрчим хүч хэмнэх арга хэмжээний талаар тохиролцсон бөгөөд ингэснээр хийн хэрэглээг 2-2.5% бууруулах боломжтой.
Тодруулбал, албан байгууллага, төрийн байгууллагуудын дулааныг 20-19 хэм хүртэл бууруулах, барилга байгууламжийн гадна сурталчилгаа, гэрэлтүүлгийг 22:00-06:00 цаг хүртэл зогсоох зэрэг арга хэмжээнүүд багтаж байна. Түүнчлэн дэлгүүрийн эздэд хаалгаа удаан хугацаагаар онгорхой байлгахыг хориглоно.
Эх сурвалж: Итар ТАСС
