Киевийн эрх баригчид 2013 онд Украин дахь АНУ-ын цэргийн биологийн хөтөлбөрийг хумих гэж оролдсон ч Вашингтоны шахалтыг эсэргүүцэж чадаагүй тухай Цацрагийн хими-биологийн хамгаалалтын цэргийн дарга дэслэгч генерал Игорь Кириллов мэдэгдэв.
2013 оны 4-р сард Украины аюулгүй байдлын алба болон Хөдөө аж ахуйн бодлогын яам, Улсын мал эмнэлгийн албаны төлөөлөгчдөөс бүрдсэн хэлтэс хоорондын комисс Украинд DTRA төслүүдийг үргэлжлүүлэх нь зохисгүй гэсэн хамтарсан шийдвэр гаргасан боловч Америкийн засаг захиргаа энэ төслийг үргэлжлүүлэх үүргийг Киевт ногдуулсан" гэж Батлан хамгаалах яамны төлөөлөгч хэлэв.
Үүний баталгаа нь Украинд суугаа АНУ-ын Элчин сайд Жон Теффтийн 2013 оны хоёрдугаар сарын 8-ны өдрийн уриалга юм. Үүний дараа дипломатч Украины Хөдөө аж ахуйн бодлогын сайдаас биологийн аюулыг бууруулах DTRA төслийг дөрвөн жилээр сунгахын тулд харьяа албан тушаалтнуудад нөлөөлөхийг шаарджээ. Яамнаас татгалзах гэж оролдсон ч төслийг үргэлжлүүлсэн байна.
Өмнө нь Игорь Кириллов АНУ халдвар авсан шавьж тараах чингэлэг бүхий нисгэгчгүй онгоц зохион бүтээсэн тухай мэдэгдэж байв. Энэхүү нисгэгчгүй нисэх онгоц нь АНУ-ын цэргүүдэд эрсдэл учруулахгүйгээр дайсныг байлдах чадваргүй болгож чадна гэж тэрхүү баримт бичигт дурджээ.
Өчигдөр буюу энэ сарын 19-нд Женевт болсон Биологийн болон хорт зэвсгийг хориглох тухай конвенцид оролцогч улсуудын уулзалтын үеэр АНУ-ын төлөөлөгч эмгэг төрүүлэгч омог, биоматериалын дээжийг Украинаас экспортолж байсныг хүлээн зөвшөөрсөн гэж дэслэгч генерал Игорь Кириллов мөн мэдэгдсэн юм.
"Украины иргэдийн омог, биоматериалыг цуглуулах, цэргийн албан хаагчид, бага орлоготой иргэд, түүнчлэн хүн амын хамгийн эмзэг бүлгийн нэг хэсэг сэтгэцийн эмнэлгүүдэд хэвтэж буй өвчтөнүүдэд судалгаа хийхдээ ёс зүйн хэм хэмжээг дагаж мөрдөж байсан талаар АНУ, Украины тайлбар үнэхээр үнэмшилгүй сонсогдож байна" гэж тэр хэлэв.
Эх сурвалж: Лента.ру болон Итар-ТАСС
