"Виз гаргаж өгнө" хэмээн залилах гэмт хэргийг олон янзаар үйлддэг. Тэдний нэг нь, хөлс мөнгөө авчихсныхаа дараа "Тийм яамны тэр ажилтанд хаяглан, материалаа шуудангаар илгээчих" гэж хэлээд сураггүй болдог хэлбэр юм.
Нэр бүхий яаманд саяхан ийм хэрэг гарчээ. Нэгэн мэргэжилтний өрөөнд дугтуйтай илгээмж иртэл дотор нь гадаад пасспорт байсан байна. Тэрбээр ажлынхаа хүмүүсээс асууж сураад, хаширлан сейфэндээ хийжээ. Гэтэл эзэн нь хэд хоноод өөрөө иржээ. Ээж нь БНСУ-д визгүйгээр амьдраад олон жил болсон ба араас нь явахын тулд виз хөөцөлдөж буй эмэгтэй байж.
Тэр цахимаар танилцсан хүнд 6 сая төгрөг өгсөн байна. Харин тухайн хүн нь тухайн яамны ажилтны нэр, өрөөний дугаарыг зааж өгөөд, "Материалаа энэ хүн рүү шуудангаар илгээчих, тэгээд бүх зүйл болчихно" гэж итгүүлсэн байна. Одоо холбоо тасарчээ.
Яамны ажилтнуудын хэлж буйгаар ийм явдал олонтаа гардаг байжээ. Байсхийгээд л нэгнийх нь ширээн дээр огт холбогдолгүй гадаад пасспорт зэрэг бичиг баримт шуудангаар ирдэг байсныг хуулийн байгууллагынхан хэлж байна. Нэг хэсэг ийм хэрэг гарахаа больсон байсан ч ийн сэргэж эхэлжээ.
Иймд иргэдийг төрийн байгууллагын нэр, хаяг зааж, шуудангаар материалаа илгээхийг даалгаад алга болдог хэлбэрийн залиланд өртөхөөс сэрэмжлүүлж байна.
Эх сурвалж: Eguur.mn
