Шанхайн хамтын ажиллагааны байгууллага (ШХАБ) Беларусь улсыг гишүүнээр элсүүлэх ажиллагааг эхлүүлнэ гэж Узбекистаны Ерөнхийлөгч Шавкат Мирзиёев Самарканд хотноо болж буй тус байгууллагын дээд хэмжээний уулзалтын үеэр мэдэгдсэн тухай РИА Новости агентлаг мэдээллээ.
Түүнчлэн Бахрейн, Мальдив, Кувейт, Арабын Нэгдсэн Эмират, Мьянмар гэсэн таван орон ШХАБ-ын яриа хэлэлцээний түншийн статус авна гэж тэр нэмж хэлэв.
Бид Бүгд Найрамдах Беларусь улсад ШХАБ-ын бүрэн эрхт гишүүний статус олгох журмыг эхлүүлэхээр шийдсэн” гэж Мирзиеев хэллээ.
Үүнээс өмнө буюу есдүгээр сарын 16-нд ОХУ-ын Ерөнхийлөгч Владимир Путин дээд хэмжээний уулзалтад оролцохоор хүрэлцэн ирсэн юм. Дээд хэмжээний уулзалтын үеэр ШХАБ-ын гишүүн орнуудын удирдагчид дэлхий нийтийн өөрчлөлтийн нөхцөлд хамтын ажиллагаагаа гүнзгийрүүлэх, ШХАБ-ыг геополитикийн шинэ бодит байдалд дасан зохицуулах, үйл ажиллагааг нь шинэчлэх, аюулгүй байдлын заналхийлэлтэй тэмцэх механизмыг боловсронгуй болгох зэрэг асуудлыг хэлэлцсэн юм. Түүнчлэн гадаад бодлогын уялдаа холбоог бэхжүүлэх, эдийн засгийн салбарын хамтын ажиллагааг нэмэгдүүлэх сэдвүүдийг хөндсөн юм.
Өмнө нь Оросын сенатор Алексей Пушков ШХАБ дэлхий дахинд нөлөөгөө нэмэгдүүлж байгааг тэмдэглэсэн юм. Түүний үзэж байгаагаар тус байгууллага нь АНУ-ын нөлөөнөөс бүрэн ангид бөгөөд үйл ажиллагаа нь Вашингтоны сурталчилж буй нэг туйлт ертөнцийн бодлого хоцрогдсоныг харуулж байна гэжээ.
Эх сурвалж:NEWS.ru
