Нийслэлийн Хүрээ амаржих газрын 2021 оны санхүүгийн тайлан, төсвийн гүйцэтгэлд аудитын шалгалт хийхэд 4.2 тэрбум төгрөгийн зөрчил илэрчээ. Аудитын байгууллагаас тус амаржих газар ирээдүйд санхүү, төсвийн хүндрэлтэй байдалд орох эрсдэлтэй гэж дүгнэн “Сөрөг” буюу хамгийн муу үнэлгээг өгсөн байна.
Хүрээ амаржих газар эм нийлүүлэгч компаниудад 527 сая төгрөгийн өртэй. Үүнээс гадна татвар, нийгмийн даатгалын өрийн хэмжээ нь 790 сая төгрөгт хүрчээ. Тодруулбал НДШ-ийн 508 сая төгрөг, ХХОАТ-ын 282 сая төгрөгийн өглөг үүсгэсэн гэж аудитын тайланд дурджээ.
Төрийн өмч эзэнгүйддэг гэдгийн тод жишээ нь Хүрээ амаржих газар болов. Уг амаржих газар 1.9 тэрбум төгрөгөөр үнэлэгдэх үндсэн хөрөнгө, 316 сая төгрөгийн бараа, материалтай гэх боловч тооллого, тооцоо хийж үлдэгдлийн баталгаажуулсан зүйлгүй байсныг аудитын шалгалтаар тогтоосон байна. Мөн амаржих газрын удирдлагууд Глобал сангаас 77 сая төгрөгийн үнэтэй эхо аппарат худалдан авч өгснийг санхүүгийн тайлангийн данс бүртгэлд тусгаагүй байжээ.
Хүрээ амаржих газрын дарга А.Жаргал, нягтлан бодогч Б.Буяннэмэх нар Шилэн дансны хуулийг мөрдөж ажилладаггүй хүмүүс аж. Тэд 457 сая төгрөгийн 32 гүйлгээний мэдээллийг хугацаа хоцроож шилэн дансандаа оруулснаас гадна 29 гүйлгээний мэдээллийг огт байршуулаагүй байна. 2015 онд Шилэн дансны тухай хуулийг татвар төлөгчид, баялаг, бүтээгчдийн мөнгөөр тансаглаж буй төрийн байгууллагууд, төсөв захиран зарцуулагчдын луйврыг ил болгох зорилгоор баталж байсан. Харамсалтай нь уг хуулийг эрх бүхий албан тушаалтнууд нь мөрдөж, хэрэгжүүлэхгүй байна.
Төрийн аудитын тухай хуульд санхүүгийн тайлангийн аудитаар “Сөрөг” дүгнэлт авсан, хуулиар хориглосон үйл ажиллагаа явуулсан, албан үүргээ биелүүлээгүй албан тушаалтанд сахилгын шийтгэл ногдуулах заалт бий. Гэвч Хүрээ амаржих газрын дарга А.Жаргал болон холбогдох албан тушаалтнуудад хариуцлага өнөөг хэр нь тооцсонгүй. Аудитын байгууллага сахилгын шийтгэл ногдуулах эрхтэй атлаа зөрчлөө арилгах тухай 4 албан шаардлагыг Хүрээ амаржихын удирдлагуудад хүргүүлээд толгойг нь илэх маягтай сууж байна.
