“Гаднаа гяланцаг дотроо паланцаг” гэдэг шиг "Маршал Таун"-ы барилгыг гаднаас нь л харахад сайхан аж. Энэ байранд хүүхдэд ээлтэй тоглоомын талбай, цэвэр сайхан орчин тэр чигт нь шийдсэн юм шиг санагдах боловч ойртоод ажиглавал аюулгүй гэхэд хэцүү нөхцөлд оршин суугчид нь амьдарч байна.
Хүүхдүүд хичээлдээ явахдаа барилга тойрч явна, эцэг эхчүүд хүүхдээ гадаа тоглоход нь цахилгааны утсан дээр гишгэчих вий гэж санаа зовно. Хотхоныг чимэх усан оргилуур дотор нь хүртэл цахилгааны утас харагдана. Тэр ч байтугай тэр утас нь тогтой. Энэ асуудал эцэг эхчүүд болон тус байрны оршин суугчдын санааг чилээж байна. Тиймээс ч хэд хэдэн удаа холбогдох байгууллагад хандсан. Гэвч ямар нэг арга хэмжээ авалгүй өнөөдрийг хүрчээ.
Иргэд хариуцсан компанид албан бичиг өгсөн ямар ч хариу ирсэнгүй
Тус хотхонд 2200 өрх амьдардаг. Өдөр бүр 200-300 хүүхэд тоглоомын талбайд тоглодог. Өмнө дурдсанчлан тогтой цахилгааны утас хүүхдийн тоглоомын талбайд ойрхон байгаа нь маш эрсдэлтэй ч жилээс жилд яригддаг энгийн үзэгдэл мэт болжээ. Иймд бид хотхоны оршин суугч Ж.Отгонбаяраас дараах мэдээллийг авлаа.
Тэрбээр “СӨХ болон Барилгын компанийн үүрэг бол 3 жил эвдрэл гэмтлээ засах ёстой. Энд 2200 өрх байна. 10000 орчим иргэн амьдарч байна. 4000 гаруй хүүхэд тоглож байна. Энэ тоглоомын талбай битүү утас. Усан оргилуурын ус дотор ил утас орсон. Нэг л өдөр энд хүүхэд нас барах эрсдэл байна. СӨХ нэртэй байгууллага нь оршин суугчдаас мөнгө аваад юу ч хийдэггүйгээс болж оршин суугчид шүүхэд араггүй эрхэнд өгч өөрсдөө СӨХ өө байгууллаа. Албан ёсоор хүлээлгэж өгнө үү”. Бид хариуцсан компанид албан бичиг өгсөн ямар ч хариу ирсэнгүй ! Эвээр гуйж зөндөө үзлээ. Дөнгөж барьсан барилга нь ашиглалтанд ороод ийм байдалтай байна” гэлээ.
Иргэд ажлаа хийхгүй байгаа СӨХ болон холбогдох байгууллагуудын уршгаар үр хүүхдээ эрсдэлд оруулахыг хүсэхгүй байгаа учраас өөрсдөө СӨХ байгуулж үйл ажиллагаагаа явуулах гэтэл хуучин СӨХ ажлаа хүлээлгэж өгөхгүй байгаа аж.
СӨХ: Өнөөдрийг хүртэл үйл ажиллагаагаа хэвийн, тасралтгүй явууулж байна
Оршин суугчдын гомдол саналын дагуу тус байрыг хариуцсан “Маршал Кинг” СӨХ мэдээллэхдээ “Эко кинг” СӨХ-ын асуудлаар бид лавлагаа, тодруулга авахаар холбогдох байгууллагуудад хүсэлт хүргүүлж, шийдвэр хүлээж байгаа бөгөөд энэ хугацаанд өнөөдрийг хүртэл үйл ажиллагаагаа хэвийн, тасралтгүй явуулж байна. Бид “Эко кинг” СӨХ-д албан ёсоор ажлаа хүлээлгэн өгөөгүй, тодруулгын хариуг иртэл хүлээлгэн өгөх боломжгүй байгаа. Бид энэхүү асуудал шийдвэрлэгдэх хүртэл ажлаа гүйцэтгэсээр байх болно” хэмээн албан ёсны мэдэгдэлдээ дурьдсан байна.
СӨХ –ын зүгээс бол тасралтгүй үйл ажиллагаагаа явуулж байгаа, бид ажлаа хийж байгаа гэх боловч хийсэн ажил нь нүдэнд үл харагдана. Тэд яг юу хийв. Бодит байдалд дүн шинжилгээ хийж үзээд асуудлыг тодорхойлоод, тодорхой арга хэмжээ авсан бол иргэд өнөөдөр ингэж бухимдах байсан уу гэдэг анхаарал татна.
Ил задгай тогны утсыг янзлаагүй, арга хэмжээ аваагүйгээс болж амиа алдсан хүүхдийн хэд хэдэн эмгэнэлт жишээг доор дурдъя.
- Одоогоос дөрвөн жилийн өмнө Сүхбаатар дүүргийн VII хорооны нутаг дэвсгэрт үйл ажиллагаа явуулдаг “Эко Шинэс” эмийн сангийн төмөр хаалганд есөн настай хүү тогонд цохиулж амиа алдсан харамсалтай хэрэг гарч байв.
- Энэ явдлаас томчууд сургамж авсангүй. 2019 онд 5 настай хүү цахилгаанд цохиулж нас барсан хэрэг гарсан. Хохирогч айл хооронд татсан цахилгааны гэмтэлтэй утаснаас болж амиа алдсан байжээ.
- Нийслэлийн Налайх дүүрэгт долоон настай охин тогонд цохиулж нас барсан харамсалтай хэрэг /2018.07.05/ гарав. Дуудлагын дагуу шалгалт хийхэд амралтын газраас хойш 250 метрийн зайд газар унасан дугааргүй шонгийн модны цахилгаан утсанд долоон настай Н гэгч охин дугуйтай явж байгаад цахилгаанд хүрч тогонд цохиулж нас барсан харамсалтай хэрэг гарав.
Энэ мэтчилэн тоглох гэж гараад харамсалтайгаар амиа алдсан хүүүхдийн тоо нэмэгдсээр байна. Ийм эмгэнэлт явдал ахиж гаргахгүй байхын тулд өнөөдөр Кинг Тауны оршин суугчид тэмцэж байна.
Эрчим хүчний тухай хуулийн 31.8-т “Хэрэглэгч этгээд өөрийн эзэмшлийн шугам сүлжээ, тоног төхөөрөмж түүний аюулгүй байдлыг хангана” гэж заасан байдаг. Өөрөөр хэлбэл, Эрчим хүчний газартай гэрээ байгуулсан этгээд буюу “Эко Констракшин” ХХК болон түүний захирал С.Нямдаваа энэ асуудалд анхаарлаа хандуулж яаралтай шийдэж өгөхийг оршин суугчид хүсэж байна.
Г.Бүжинлхам
