Сербийн Белград хотноо болж буй бөхийн сонгомол, чөлөөт ( эр, эм) барилдааны дэлхийн аварга шалгаруулах тэмцээний эмэгтэй чөлөөт бөхийн тэмцээн хоёр дахь өдрөө үргэлжилж байна. Өнөөдөр эмэгтэйчүүдийн 50 кг-ийн жинд ноднингийн ДАШТ-ий хүрэл медальт Долгоржавын ОТГОНЖАРГАЛ Узбекистан, Румыний бөхчүүдийг цэвэр ялан хагас шигшээд шалгарч, улмаар АНУ-ын бөх , Токиогийн олимпийн мөнгө, ДАШТ-ий хошой хүрэл медальт Сара Энн Хильдебрандтийг 6:2 оноогоор хожин финалд алтан медалийн төлөө Японы бөх Токиогийн олимпийн аварга, Дэлхийн хошой аварга Юи Сүсакитай хүч үзнэ.
Мөн эмэгтэйчүүдийн 53 кг-ийн жинд барилдсан Батхуягийн ХУЛАН Энэтхэг , Казахстан, Азербайжаны бөхчүүдийг ялаад, хагас шигшээд Шведийн Эмма Мальмгренийг 0: 6 оноогоор хожигдож яваад өрсөлдөгчөө цэвэр дарж хожив. Б.Хулан өнөөдөр алтан медалийн төлөө АНУ-ын бөх Доминик Парриштай барилдана.
Эх сурвалж: Ц.Энхтүвшин Таван цагариг сонин Гэрэл зургийг Д.Нямбилэг ( МССХ)
