Монголын анхны хамгийн өндөр буюу 600 сая төгрөгийн бооцоотой тулаанд МУГТ Э.Цэндбаатар, Холимог тулаанч З.Шинэчагтга нар мэргэжлийн боксын төрлөөр /2022.09.09/ өрсөлдсөн.
Тамирчид нийт найман үе тулалдсан бөгөөд МУГТ Э.Цэндбаатар оноогоор илүүрхэж, ялалт байгуулсан билээ. Олон хоног тулаан сонирхогчдыг хүлээлгэж, суудлаасаа хараймаар гал гарсан тулаан болж өндөрлөсөн гэхэд хилсдэхгүй.
Харин тулааны дараа МУГТ Э.Цэндбаатар “Монголд З.Шинэчагтга шиг залуу, над шиг сайн тамирчин дахиад олон төрөх болтугай. Монголынхоо бүх ард түмэнд хайртай шүү. Шинээ өөрийнхөө төрлөөр намайг тулаанд дуудвал энэ 600сая төгрөгөө 1.2тэрбум болгож аваарай. Чамд амжилт хүсье” хэмээн хэлсэн.
Тэгвэл МУГТ Э.Цэндбаатараас зарим зүйлийн талаар асууж тодрууллаа.
-Тулаанд ялалт байгуулсанд баяр хүргэе?
-Баярлалаа. Сайхан тулаан болж өндөрлөсөн шүү. Монголын ард түмэндээ баярлалаа гэж хэлье.
-Нэлээд хурц маргаан өрнөж цэглэгдэх болов. Одоо З.Шинэчагтга та хоёрын хооронд ямар нэг асуудал бахгүй биз дээ?
-Одоо бид хоёрын хооронд ямар нэг асуудал байхгүй. Эр улсууд шиг тэврэлдээд салсан. Бид хоёр хоёулаа баяртай байна. Шинээ өөрийнхөө төрлөөр намайг тулаанд дуудвал би дуртайяа хүлээж авах болно.
-Тулаанд ялсан бооцооны мөнгөө авсан уу. Анх тулаан дуусаад л ялсан нь аваад гарна гэж ярьж байсан шүү дээ?
-Бооцооны мөнгө хараахан орж ирээгүй байна. Хэрвээ ороод ирчихвэл би олон нийтэд зарлах болно.
-Хорт хавдартай хүүхдэд тусална гэж ярьсан хэвээрээ юу?
-Хэвээрээ байгаа. Бид хоёрын хэн ч ялсан сайн үйлсийн аян хийх байсан. Би тулааны дараа өөрийнхөө төрлөөр дуудаад 1.2 тэрбум болгож аваарай гэсэн үгэндээ ч гэсэн бат зогсох болно. Тулааны спортыг үнэ цэнтэй болгосон сайхан тулаан болсон. Бүгдэд нь баярлалаа.
Эх сурвалж: Eguur.mn
