"Их 20"-ийн дээд хэмжээний уулзалтын үеэр Орос, Украины ерөнхийлөгч Владимир Путин, Владимир Зеленский нарын уулзалтыг Индонез улс зохион байгуулахад бэлэн байгаагаа илэрхийлэв. Индонезээс ОХУ-д суугаа Элчин сайд Хосе Таварес энэ тухай ярьсныг РИА Новости мэдээллээ.
"Энэ бол маш боломжтой нөхцөл юм. Хэрэв тэд энэ платформыг ашиглавал үнэхээр сайхан байх болно, Тиймээс Индонези энэ асуудалд туслахад бэлэн байна” гэж дипломатч хэлэв. Тэрбээр мөн тус хоёр улсын хэлэлцээрт завсарлага үүссэнд харамсаж байгаагаа илэрхийллээ.
“Гэхдээ Индонез улс Туркийн санал болгож буй хэлэлцээрийг түрүүлж явуулахыг дэмжиж байна. Хэрэв тэд Бали дахь G20-ийн дээд хэмжээний уулзалт болох газрыг уулзалтандаа ашиглахыг хүсч байгаа бол яагаад болохгүй гэж? Энэ бол маш том боломж” гэж Таварес нэмж хэлэв.
ОХУ-ын Ерөнхийлөгчийн хэвлэлийн нарийн бичгийн дарга Дмитрий Песков өмнө нь Владимир Путиныг G20-ийн дээд хэмжээний уулзалтад оролцох форматын шийдвэрт аюулгүй байдлын нөхцөл нөлөөлсөн гэж мэдэгдээд байгаа юм.
Харин Элчин сайд Хосе Таварес "Энэ жил G20-ийн дээд хэмжээний уулзалтыг зохион байгуулах орны хувьд бид мэдээж бүх оролцогчдын аюулгүй байдлын баталгааг хангах болно" гэж онцлон тэмдэглэв.
Тодотгоход, ирэх 11 дүгээр сарын 15-16-ны өдрүүдэд Их-20 буюу G20-ын орнуудын дээд хэмжээний уулзалт Индонезийн Бали аралд болох юм.
Эх сурвалж: Лента.ру
