Улаанбаатар хотод зам тээврийн удирдлагын ухаалаг систем нэвтрүүлснээр түгжрэлийг 50 хүртэлх хувь багасгах зорилтод хүрэхэд 30 хувийн нөлөө үзүүлнэ гэсэн тооцоолол бий.
Зам тээврийн удирдлагын ухаалаг системийг үндсэн гурван чиглэлээр хэрэгжүүлж байна. RFID буюу радио давтамжийг ашиглах систем үүнд багтана. Энэ нь камерын систем биш, автомашины зорчилтыг уулваруудад таних шинэ уншигч юм. Удирдлага, хяналтын энэ системийг шинээр төвийн 6 дүүрэгт хэрэгжүүлж байна. Тээврийн цагдаагийн ажлыг цахимжуулж, иргэд цахимаар торгууль төлдөг систем рүү шилжих юм. Үүнд 22.3 тэрбум төгрөг төсөвлөсөн бөгөөд Улаанбаатар хотын гудамж, зам, талбайг камержуулахад хувийн хэвшилтэй хамтарч ажиллахыг нийслэлийн Сургалт судалгаа, олон нийттэй харилцах газар мэдээллээ.
Авто замын сүлжээний хөндлөн, босоо чиглэлд гол болон туслах зам барьж, зогсоолуудыг нэмж байгаа. Их багтаамжийн буюу 5 болон 9 давхар зогсоол барихад 8 тэрбум төгрөг төсөвлөжээ. Явган хүний 16.8 км зам, унадаг дугуйн 14.4 км замыг шинээр барихад 11.2 тэрбумыг зарцуулж байгаагаас гадна 74 ил зогсоолыг шинэчлэх юм. Энэ бүхэн 414 тэрбум төгрөгийн төсөвт багтсан ажлууд аж. Нийт төсөвт өртгийн 62 хувьтай тэнцэх хэмжээний бүтээн байгуулалт он дамнан хэрэгжихээр байгаа. Өөрөөр хэлбэл 40 хүрэхгүй хувь нь энэ ондоо багтаж дуусах тул энэ зохицуулалтыг 3 жилийн төлөвлөлттэй хийж байна. Ирэх оны төсвийн 70 орчим хувийг 2022 он дамнасан төсөв эзлэх магадлалтай байна.
